Sadhuta ni Pagdandi Part 4

SR No.: 008079
Original Sutra Author: N/A
Author: Manilal Patel
Publisher: Mahavir Sahitya Prakashan Mandir Ahmedabad
Publication Year: 1999
Total Pages: 246
Language: Gujarati
Classification: Book_Gujarati & Religion
File Size: 13 MB

Page 140

પૂ. મહારાજશ્રીનો અધિકાર છે, તે કહી શકે. હું અધિકારી નથી. લીંબડી સંપ્રદાય અધિકારી છે. આને હું મારું પિતૃસ્થાન જ માનું છું. પૂ. ગુરુદેવની સાથે છૂટા પડ્યા પછી પણ તેમની જે ઉદારતા રહી છે, તેને હું મારું ગૌરવ માનું છું. સાધુ સંન્યાસ લે છે, ત્યારે આખા વિશ્વને પોતાનું કુટુંબ સમજે છે. ઉપકરણો વિકાસમાં ઉપયોગી થાય છે. તે બદલ તમારો આભાર માનીશ. હું જે કંઈ માનું છું તે જૈનાચાર્યોનાં જીવનચરિત્રો અને આગમોના અભ્યાસને સામે રાખી વર્તુ છું. કેટલાક દૂર રહ્યાં એમ માનતાં હશે કે મહારાજ કોદાળી, પાવડા લઈને ખોદવા જતા હશે. તળાવ અને કૂવા બંધાવતા હશે. એ તો તેઓ જુએ તો જ ખ્યાલ આવે.
હું ગામડામાં નાના નાના મંડળો રચવાની પ્રેરણા આપું છું. તેની વિગતમાં ઊતરું છું. હું માનું છું કે, ધનની પ્રતિષ્ઠા એટલી વધી ગઈ છે કે, ધર્મદષ્ટિએ સમાજરચવાનો પ્રયોગ કરીને લોકોને ઊંચા લઈ જવા જોઈએ એનો પ્રયત્ન કરું છું. મારી એક વિશિષ્ટ પ્રકારની દૃષ્ટિ છે. સમાજનાં બધાં બળો સાથે મેળ રાખું છું. પણ એક દર્શન રાખીને. નીચલા થરનો સંપર્ક વધારે રાખું છું. અને જેનો સંપર્ક હોય તેના તરફ લાગણી કુદરતી જ રહે !
મારા નિયમો હું બરાબર પાળું છું. પાદવિહાર, બિનમાંસાહારીને ત્યાંથી ભિક્ષા, પછી તે ભંગી કેમ ન હોય ! રાત્રિ ભોજન હોય જ નહિ. અસ્પૃશ્યતા નિવારણ, જૈનધર્મમાં તો છે નહીં, હરિજનો જયાં આવી શકતા હોય, તેવાં મંદિરો અને ઉપાશ્રયોમાં રહું છું, ઊતરું છું. ચોમાસાનો ખ્યાલ રાખું છું. તમારાથી છૂટા પડ્યા પછી પણ તમો જે પ્રેમ બતાવો છો તેની હું કદર કરું છું. સ્ત્રીનો હું સ્પર્શ કરતો નથી. છતાં તેઓ મારી સાથે રહે તેમાં બાધ માનતો નથી. આ બધી વાતો ખુલ્લી છે. તમને જે કંઈ પ્રશ્ન થાય તે પૂછી શકો છો.
બપોરના મહિલા મંડળની મુલાકત લીધી હતી. તેની ત્રણ શાખાઓ અહીં ચાલે છે. સીવણ, કાંતણ અને ભરતગૂંથણ વગેરે પ્રવૃત્તિ ચલાવે છે.
અહીંથી સ્થાનકવાસી બોર્ડિંગમાં ગયા. વિદ્યાર્થીઓ સાથે વાતો કરી. રાત્રે જાહેરસભા થઈ. તેમાં અહિંસા વિષે સુંદર પ્રવચન થયું. પૂ. નાનચંદ્રજી મહારાજે પણ નિર્ભયતા હોય તો જ અહિંસા આવે; તેની ઉપર ભાર મૂક્યો હતો. સાધુતાની પગદંડી
૧૧૧