________________
* ૨૯-૧૨-૪૭ : ગાંગડ
કોઠથી વિહાર કરી ગાંગડ આવ્યા. અંતર ચાર માઈલ. ઉતારો સેવાસમાજના મકાનમાં રાખ્યો હતો. * ૩૦-૧૨-૪૭ : ભામસરા
ગાંગડથી ભામસરા આવ્યા. અંતર ચાર માઈલ. લોકોને ડાંગરના ભાવ વિશે સમજૂતી આપી.
સાંજના વિહાર કરી કેસરડી આવ્યા. અહીં પણ નૈતિક ભાવ અંગે જ સમજૂતી આપી.
ભામસરાથી કેસરડી થઈ ઝાંપ આવ્યા.
અહીં દસેક દિવસ રોકાવાનું ગોઠવ્યું. ઉતારો બળદેવભાઈના ઉતારે હતો. નળકાંઠા ખેડૂતમંડળની નક્કર રચના થાય એ માટે આટલા દિવસ આપવા જરૂરી હતા. ભાલ નળકાંઠા ખેડૂતમંડળની રચના :
સભા ભરવા માટે મોટર દ્વારા જ્યાં સુધી પહોંચાય ત્યાં સુધી પહોંચીને ખબર આપ્યા. લગભગ 50 ગામના ખેડૂતોને આમંત્રણ મોકલ્યાં હતાં. ૪૪ ગામના લોકોએ હાજરી આપી હતી. રવિશંકર મહારાજ, લક્ષ્મીદાસ આસર પણ આવ્યા હતા. તેમણે ખેડૂતોને સુંદર સલાહ આપી હતી છેવટે ભાલ નળકાંઠા ખેડૂત મંડળ સ્થાપવાનું નક્કી થયું હતું. નૈતિક ભાવે પોતાની ડાંગર આપે તે સભ્ય બને એમ ઠરાવ્યું હતું. પરહદમાં માલ નિકાસ ન થાય તે માટે પોલીસ ઉપરાંત સ્વયંસેવકોની પણ મદદ મેળવવા પ્રયત્ન થયો હતો. અત્યારે લગભગ ૧૩ હજાર મણ ડાંગર ખરીદાઈ છે, ખરીદી ચાલુ રાખી છે. મહારાજશ્રી અને શ્રીઆસર ફરી આવ્યા હતા. ખોટ આવશે તોપણ આસર ભોગવશે એમ ઠરાવ્યું હતું. ત્યારબાદ ફરીથી તા. ૧૧-૧-૪૮ના રોજ ખેડૂતોની એક સભા બોલાવી હતી તેમાં કારોબારી અને સભ્ય થનારે ૧૦ ટકા મરજિયાત લેવી, ફરજિયાત આપવી જોઈએ એમ ઠરાવ્યું હતું. મંત્રી તરીકે શ્રી અંબુભાઈ શાહ કામ કરશે. આ શરતે કારોબારીમાં લેવામાં આવ્યા છે. આર્થિક બધી જવાબદારી તેમણે લીધી છે. ઘઉની ખરીદી માટે ઘોળી મુકામે તા. 30ના રોજ એક સભા ભરવા ઠરાવ્યું, તેમાં પૂ. દાદા અને શ્રી અસર પણ હાજરી આપે એમ નક્કી થયું.
સાધુતાની પગદંડી
