Page Text
________________
સંવત ૨૦૭૪ ની સાલનું ચાતુર્માસ રાજકોટમાં કરવાનું વિચાર્યું. રાજકોટમાં ચાતુર્માસ કરવાનું એક બીજું પણ પ્રયોજન હતું, તે એ કે સૌરાષ્ટ્રના મુખ્ય કાર્યકરો રાજકોટમાં જ રહેતા હતા. રચનાત્મક પ્રવૃત્તિ પણ રાજકોટમાં ચાલતી હતી. વળી રાજ્યોનું એકીકરણ થઈ સૌરાષ્ટ્રનું પ્રજાકીય રાજ્ય રચાવાની તૈયારીઓ ચાલતી હતી. એટલે તેવા સમયમાં પોતે હાજર હોય તો, પોતાનું આદર્શ સમાજરચનાનું જે ચિત્ર છે તેને બરાબર સમજાવી શકાય.
આ દષ્ટિએ સૌરાષ્ટ્ર પ્રવેશ કરીને સૌ પ્રથમ પોતાના ગુરુદેવ પૂ. શ્રી નાનચંદ્રજી મહારાજનાં દર્શન કરવા સાયલા પધાર્યા. ત્યાં પંદર દિવસ રોકાયા. ગુરુના સત્સંગનો લાભ લીધો. ત્યાંથી હાલાર તરફ પ્રવાસ કરી રાજકોટ આવ્યા. ચાતુર્માસને એક મહિનાની હજી વાર હતી, પરંતુ તે પહેલાં અઠવાડિયું રોકાયા અને જુદી જુદી સંસ્થાઓ, સ્થળો અને જાણીતી વ્યકિતઓની મુલાકાત લીધી. આ સમય દરમ્યાન ભરચક કાર્યક્રમો રહ્યા. એક દિવસ રાજકોટના નાગરિકો તરફથી મહારાજશ્રીને સન્માનવા અને તેમના ચાતુર્માસને આવકાર આપવા જાહેર સભા થઈ. મહારાજશ્રીની વિદ્વતાનો લાભ રાજકોટને મળશે તે બદલ આનંદ વ્યકત કરતાં જુદા જુદા વકતાઓએ પ્રવચન કર્યા. જૈન આગેવાનોએ પણ ઉત્સાહથી બધી જ સગવડ સહકાર આપવાનું કહ્યું. સભામાં ચાતુર્માસના ખર્ચ બદલ થોડો ફાળો પણ થયો.
બચુભાઈ કુટુંબ સાથે મુંબઈથી અહીં અગાઉથી જ આવી ગયા હતા. તેમની ઈચ્છા ચાતુર્માસનો બધો ખર્ચ ભોગવવાની હતી. મહારાજશ્રી હંમેશા એવી ઈચ્છા રાખતા કે એક વ્યકિત કરતાં સમાજ સ્વેચ્છાથી ભાર વહેચી લે તે વધુ સારું છે. સમાજ ભાગીદાર બનતો હોવાથી કામકાજમાં તેની આત્મીયતા રહે છે. જવાબદારી પણ રહે છે. સંતોની પણ એક જાતની ચોકી રહે છે. બચુભાઈએ વાત પ્રેમથી સ્વીકારી. જો કે ચાતુર્માસનો મોટા ભાગનો ખર્ચ તેમણે જ ઉપાડયો હતો.
આ વખતે મહારાજશ્રી અને આગેવાનો ચાતુર્માસના નિવાસની પસંદગી માટે જુદાં જુદાં સ્થાન જોવા નીકળ્યા. આગેવાનોમાં એક જૈન આગેવાન કે જેઓ માથાભારે ગણાતા તેઓ પણ સાથે હતા. અહીંના સ્થાનકવાસી જૈનોમાં બે પક્ષ હતા. એક પક્ષ જે નાનો હતો તેના આગેવાન આ ભાઈ હતા. તેમણે પોતે એક ઉપાશ્રય બંધાવ્યો હતો. તેમાં પધારવાનું અને ખર્ચની બધી જવાબદારી માથે લેવાનું કહ્યું. સૌરાષ્ટ્રની વિહારયાત્રા
૧૪૩
| SR No. | 008077 |
| Book Title | Sadhuta ni Pagdandi Part 2 |
| Original Sutra Author | N/A |
| Author | Manilal Patel |
| Publisher | Mahavir Sahitya Prakashan Mandir Ahmedabad |
| Publication Year | 1994 |
| Total Pages | 217 |
| Language | Gujarati |
| Classification | Book_Gujarati & Religion |
| File Size | 14 MB |