________________
[पलिमंथपगयं] [सुत्तं] छ कप्पस्स पलिमंथू पण्णत्ता, तं जहा-कोक्कुइए संजमस्स पलिमंथू १ मोहरिए सच्चवयणस्स पलिमंथू २ चक्खुलोलए इरियावहियाए पलिमंथू ३ तितिणिए एसणागोयरस्स पलिमंथू ४ इच्छालोभए मुत्तिमग्गस्स पलिमंथू ५ भिज्जानियाणकरणे मोक्खमग्गस्स पलिमंथू ६। सव्वत्थ भगवता अनियाणया पसत्था ॥६-१९॥
"छ कप्पस्स पलिमंथू०" सुत्तं उच्चारेयव्वं । सम्बन्धः - दप्पेण जो उ दिक्खेति एरिसे एरिसेसु वा विहरे । तत्थ धुवो पलिमंथो, को सो कतिभेद संबंधो ॥६३११॥ अहवा सव्वो एसो, कप्पो जो वण्णिओ पलंबादी । तस्स उ विवक्खभूता, पलिमंथा ते उ वज्जेज्जा ॥६३१२॥ आइम्मि दोन्नि छक्का, अंतम्मि य छक्कगा दुवे हुँति । सो एस वइरमज्झो, उद्देसो होति कप्पस्स ॥६३१३॥ "दप्पेण जो०" ["अहवा सव्वो०" आइम्मि०"] गाहात्रयं कण्ठ्यम् । पलिमंथे णिक्खेवो, णामा एगट्ठिया इमे पंच । पलिमंथो वक्खेवो, वक्खोड विणास विग्यो य ॥६३१४॥ [नि०]
"पलिमंथे णिक्खेवो०" गाहा । णिक्खेवो-नामादि चउव्विहो । वइरित्तो दव्वपलिमंथो इमो
करणे अधिकरणम्मि य, कारगकम्मे य दव्वपलिमंथो । एमेव य भावम्मि वि, चउसु वि ठाणेसु जीवे तु ॥६३१५॥ दव्वम्मि मंथितो खलु, तेणं मंथिज्जए जहा दधियं । दधितुल्लो खलु कप्पो, मंथिज्जति कोकुआदीहिं ॥६३१६॥
"करणे अधि०" ["दव्वम्मि०"] गाहा । कारणे मंथाणो को दधि मंथेइ, अधिकरणं तं मंथणीए मंथेति । कारओ जो विरोलेइ । कम्मं तं मंथिज्जमाणं महियं नवणीतं
