________________
॥ कसिणाकसिणपगयं ॥ [सुत्तं]–नो कप्पति निग्गंथाण वा निग्गंथीण वा कसिणाई वत्थाई धारित्तए वा परिहरित्तए वा । कप्पति निग्गंथाण वा निग्गंथीण वा अकसिणाई वत्थाइं धारित्तए वा परिहरित्तए वा ॥३-७॥
संबंधोपडिसिद्धं खलु कसिणं, चम्मं वत्थकसिणं पि णेच्छामो ।
अववादियं तु चम्मं, ण वत्थमिति जोगणाणत्तं ॥३८७९॥
"पडिसिद्धं खलु०" गाहा । कण्ठ्या । वत्थं णाववादियं, णाकारो पडिसेहो । किं पडिसेहेति ? कप्पणं । कस्स ? कसिणाणं वत्थाणं । कसिणं णाम सकलं । धारणा णाम परिभुज्जति । परिहरणा परिवहति । एस सुत्तत्थो । तं चेव णिज्जुत्तीए वित्थारेति -
कसिणस्स उ वत्थस्सा, णिक्खेवो छव्विहो तु कातव्वो । नाम ठवणा दविए, खेत्ते काले य भावे य ॥३८८०॥ [नि०] दुविहं तु दव्वकसिणं, सकलक्कसिणं पमाणकसिणं च । एतेसिं दोण्हं पी, पत्तेय परूवणं वोच्छं ॥३८८१॥ घण मसिणं णिरुवहयं, जं वत्थं लब्भते सदसियागं । एतं तु सकलकसिणं, जहण्णगं मज्झिमुक्कोसं ॥३८८२॥
"कसिणस्स उ०" ["दुविहं तु०" "घण मसिणं०"] गाहा । दव्वकसिणं गाहासिद्धं । 'निरुवयं' ति ण दटुं वा कोढियं वा । तं पुण तिविहं - जहण्णयं मज्झिमं उक्कोसं । मुहपोत्तिय-रयहरण-कप्पा जहासंखं । इदमन्यत् प्रमाणतः ।
वित्थाराऽऽयामेणं, जं वत्थं लब्भए समतिरेगं । एतं पमाणकसिणं, जहण्णयं मज्झिमुक्कोसं ॥३८८३॥ जं वत्थ जम्मि देसम्मि दुल्लहं अच्चियं व जं जत्थ । तं खित्तजुयं कसिणं, जहण्णयं मज्झिमुक्कोसं ॥३८८४॥ जं वत्थ जम्मि कालम्मि अग्घितं दुल्लभं व जं जत्थ ।। तं कालजुतं कसिणं, जहण्णयं मज्झिमुक्कोसं ॥३८८५॥
