________________
॥ वियारभूमी-विहारभूमीपगयं ॥ [सुत्तं] नो कप्पति निग्गंथस्स एगाणियस्स राओ वा वियाले वा बहिया वियारभूमि वा विहारभूमिं वा निक्खमित्तए वा पविसित्तए वा । कप्पइ से अप्पबिइयस्स वा अप्पतइयस्स वा राओ वा वियाले वा बहिया वियारभूमि वा विहारभूमि वा निक्खमित्तए वा पविसित्तए वा ॥१-४८॥
"नो कप्पइ निग्गंथस्स एगाणियस्स०" सुत्तं उच्चारेयव्वं । सम्बन्धे -
आहारा नीहारो, अवस्समेसो तु सुत्तसंबंधो । तं पुण ण प्पडिसिद्धं, वारे एगस्स निक्खमणं ॥३२०७॥ "आहारा०" गाहा । कण्ठ्या । नियुक्तिविस्तरः - रत्तिं वियारभूमी, णिग्गंथेगाणियस्स पडिकुट्ठा ।
लहुगो य होति मासो, तत्थ वि आणाइणो दोसा ॥३२०८॥ [नि० ]
"रत्तिं वियार०" गाहा । न वट्टइ रत्तिं एगाणियस्स वियारभूमि गंतुं । सा वियारभूमी दुविहा–काइए उच्चारे य । तत्थ काइए ताव भणति-जइ जाति एगाणिओ मासलहुं, आणादि ।
तेणाऽऽरक्खियसावयपडिणीए थीणपुंसतेरिच्छे ।
ओहाणपेहि वेहाणसे य वाले य मुच्छा य ॥३२०९॥
"तेणारक्खिय०" गाहा । तेणेहिं दुविहेहिं उवही सो वा हीरेज्ज, आरक्खिएहिं वा गिण्हणाई, सावएहिं खज्जेज्ज, पडिणिएहिं वा पंताविज्जेज्ज, इत्थी-णसओ वा एक्काणियं गेण्हेज्ज, तिरिक्खो वा दट्टो आहणेज्ज, तिरिक्खजोणिं वा पडिसेवेज्ज । 'वेहाणसे' त्ति । अस्य व्याख्या -
थी पंडे तिरिगीसु व, खलितो वेहाणसं व ओधावे । सेसोवधीसरीरे, गहणादी मारणं जोए ॥३२१०॥ दुप्पभिई उ अगम्मा, ण य सहसा साहसं समायरति । वारेति च णं बितिओ, पंच य सक्खी उ धम्मस्स ॥३२११॥
"थी पंडे०' ["दुप्पभिइ उ०"] गाहा । इत्थीए पंडएहिं वा खलिओ मेहुणपडिसेवणाए अद्धिईए वेहाणसं करेज्ज ओधाणुप्पेही वा गच्छेज्ज । 'सेस' त्ति सेसाणि दाराणि । उवहीए वा भयं गहणादीया वा होज्ज, मारेज्ज वा, वालेहि वा साणेहिं वा खज्जेज्ज,
