________________
३०९
भासगाहा-२६८५-२६९७] पढमो उद्देसो जहा संते धणे धारणओ, जइ से कज्जं राउलबलेण धणियं धरेइ । अवसेण कज्जं धणं चेव दाउं णिरिणी भवइ । असंतधणो पुण तेण धणिएण अवसो वसीकज्जइ । एवं जस्स धितीबलं सारीरं च बलं अत्थि, सो तं कम्मं खवेइ । जस्स नत्थि धिती सारीरं च बलं, सो तेण कम्मेण वसीकज्जइ । तं पुण किं उदिन्नं खवेइ, अनुदिन्नं खवेइ ? अत उच्यते -
सहणोऽसहणो कालं, जह धणिओ एवमेव कम्मं तु । उदियाऽणुदिए खवणा, होज्ज सिया आउवज्जेसु ॥२६९२॥
"सहणाऽसहणो०" गाहा । जहा–बलिओ वणिओ कालनिरोहे, पुण्णे वा अपुण्णे वा दवावेइ । दुब्बलए पुण धणिए धारणओ न देइ । एवं दुविहं संघयणजुत्तो उदिन्नं वा खवेज्ज अणुदिन्नं वा । 'सिय' त्ति ण सव्वो । एवं जो संघयणहीणो सो नवरं अणुदिन्ने देसं खवेइ आउयवज्जासु कम्मपगईसु उदिन्नं खवेइ । तं पुण अहिगरणं कहं उप्पज्जेज्ज ? अत उच्यते -
सच्चित्ते अच्चित्ते, मीस वओगय परिहार देसकहा । सम्ममणाउट्टते, अहिगरणमओ समुप्पज्जे ॥२६९३॥ [नि०] "सचित्ते०" दारगाहा । अस्य व्याख्या -
आभव्वमदेमाणे, गिण्हंत तहेव मग्गमाणे य । सच्चित्तेतरमीसे, वितहापडिवत्तिओ कलहो ॥२६९४॥ विच्चामेलण सुत्ते, देसीभासा पवंचणे चेव ।
अन्नम्मि य वत्तव्वे, हीणाहिय अक्खरे चेव ॥२६९५॥ परिहारियमठवेंते, ठवियमणवाए निविसंते वा । कुच्छियकुले व पविसइ, चोइयऽणाउट्टणे कलहो ॥२६९६॥ देसकहापरिकहणे, एक्के एक्के व देसरागम्मि ।
मा कर देसकहं ति य, चोइय अठियम्मि अहिगरणं ॥२६९७॥
"आभव्वमदेमाणे०' ["विच्चामेलण.'' "परिहारिय०'' “देसकहा परिकहणे०"] गाहाओ । सचित्तं सेहं, अचित्तं उवकरणं, मीसं सभंडमत्तोवकरणसेहं । वायोगते ऊणं भणियं अहिगं वा दुज्झणिए वा परिहारियकुलाणि वा निव्विसइ । तत्थ वारिओ भणिइ-तुज्झ किं बप्पसंतियाइं तो वारेह । अम्हे देसो चोक्खो, लाढाणं अचोक्खो त्ति एवमाइणा । एवं उप्पण्णे अहिकरणे -
