________________
આત્મ-કથા
મારા શરીરને ક્ષુલ્લક બ્રહ્મચારી ધર્મદાસ કહેવાવાળા કહે છે. તે જ હું મારા સ્વાત્માનુભવની પ્રાપ્તિ થઇ તે પ્રગટ કરું છું. મારા શરીરનો જન્મ તો સવાઇ જયપુર રાજ્યમાં, જિલ્લા સવાઇ માધોપુર, તાલુકા બેલીગામ, બપૂર્ણનો છે. મારું શરીર, ખંડેલવાલ શ્રાવક ગૌત્ર ગિરધરવાળ/ચૂડીવાળ ગદિયા કુળમાં ઉત્પન્ન થયું છે. મારા શરીરના પિતાનું નામ શ્રીલાલજી હતું તથા મારી માતાનું નામ જ્વાલાબાઈ હતું. અને મારા શરીરનું નામ ધન્નાલાલ હતું. અત્યારે મારા શરીરનું નામ ક્ષુલ્લક બ્રહ્મચારી ધર્મદાસ છે.
અનુક્રમે મારા શરીરની વય વીસ વર્ષની થઇ ત્યારે કારણ પામીને હું ઝાલરાપાટણ આવ્યો. ત્યાં દિગંબર જૈન મુનિ શ્રી સિદ્ધશ્રેણિજી હતા. હું તેમનો શિષ્ય થયો. સ્વામીજીએ મને લૌકિક વ્રત, નિયમ આપ્યા. તેથી મેં વિક્રમ સં. ૧૯૨૨ થી ૧૯૩૫ સુધીમાં કાયકલેશ તપ કર્યા. ભાવાર્થઃ મેં આ તેર વર્ષોમાં ૨૦૦૦ નિર્જળ ઉપવાસ કર્યા, બે-ચાર જિનમંદિર બનાવ્યા, પ્રતિષ્ઠા કરાવી અને સમ્મેદશિખર, ગિરનાર આદિ જૈન તીર્થે ગયો; બીજા ભૂશયન, પઠન, પાઠ, મંત્રાદિક ઘણાં કર્યાં, જેને લીધે મારા અંતઃકરણમાં અભિમાન અહંકારરૂપી સર્પનું ઝેર વ્યાપી ગયું હતું, તેથી હું પોતાને સારો માનતો હતો અને બીજાઓને ખોટાં/ જૂઠાં/ બૂરાં માનતો હતો. તેવી બહિરાત્મક દશામાં દિલ્લી, અલીગઢ, કોયલ આદિ મોટા શહેરોમાં તેરાપંથી શ્રાવકો મારા ચરણોમાં પ્રણામ, નમસ્કાર, પૂજા કરતા હતા; જેને લીધે પણ મારા અંતઃકરણમાં એવું અભિમાન અજ્ઞાન હતું કે ‘હું સારો છું, શ્રેષ્ઠ છું' અર્થાત્ તે સમયે મને એવો નિશ્ચય ન હતો કે નિંદા, સ્તુતિ, પૂજા દેહની અને નામની છે.
