Page Text
________________
[२८४]
'कहमेयमेवं ?' तेण भणियं – 'सुण ।
एत्थ बकुलदत्तो नाम मयहरो अहेसि । तस्स भज्जा संगमा नाम । पुत्तो य से जमलगो । माहणो य पुत्ताणत्तगकारओ डिंडगो नाम । मोहवसेण लग्गा संगमा डिंडगस्स । न बकुलदत्तो वियाणइ । संगमाए चितियं - 'न मयहरे जीवमाणंमि डिंडगेण सह वीसत्थं कीलिज्जइ । ता वावाएमि एवं' । भणिओ डिंडगो - 'अहं मयहरं गोउलं पेसिस्सं । तए वि वावाइयव्वो एस जेणऽम्हे रत्ति दियहं च सुहेण चिट्ठामो'। पडिवण्णं डिंडगेण । अण्णया भणिओ संगमाए मयहरो – 'न गोउलं सुट्ठ संवहइ त्ति पडियग्गेहि डिंडगेण सह' । पयट्टो मयहरो । समप्पियं डिंडगस्स हत्थियारं । खड्डमोयरंतो य वावाइओ डिंडगेण । पडिनियत्तो डिंडगो । कओ कोलाहलो 'चोरेहिं मयहरो वावाइओ' त्ति । धाविओ लोगो । पलाय त्ति न दिट्ठा चोरा । सक्कारिओ मयहरो । सो उण तहा मओ अट्टज्झाणदोसेण जाओ तत्थेव सूयरो।
___अइक्कंतो कोइ कालो । पसत्ता संगमा डिंडगंमि । लक्खेइ इमं तो वि लज्जइ माऊए जमलगो। न उण सुट्ठोसं(तद्दोसं ?) सहइ छिवइ सत्थे य भणिएहिं । संगमाए चिंतियं – 'एसो वि मे एत्थ परिपंथगो। ता एवं वावाएमि' । भणिओ डिंडगो - 'मणुस्सीहूओ इयाणिं जमलगो । करेइ य णे भोगविग्धं । ता एवं पि नेह पिउपंथेणं' । पडिवण्णं डिंडगेण । तहेव पयट्टो गोउलं । सयमेव गहियं हत्थियारं जमलगेण । गया निजेक्खुवाडमझेण । तत्थ य रिउण्हाय त्ति भुत्ता नियमहिला अणेण म(प)त्थंतेण । तओ खड्डमोयरंताण कुट्ठारगं दिण्णं मुणिणो(?) समाकड्डमाणस्स य दुयं दिट्ठा डिंडगस्स छाया जमलगेण । तुरिययरमोइण्णो एसो । भि(वि?)त्तं से हिययं 'सव्वहा न सुंदरमिणं'ति । पत्ता गोउलं । कया पाणवित्ती । पडियग्गिउं च गोउलं सुत्ता रयणीए परोप्परमइदूरे अवक्खा(?) हिययंमि । न एइ जमलगस्स निद्दा । सुओ य तेण पायरवो । तओ तुरियं सेज्जाए सरीरहाणे खडपूलयमुत्तमंगभागे हंडियं काऊण पक्खित्तमुवरि वत्थं । सयं च खग्गं घेत्तूण ठिओ संधयारप्पएसे । जाव गओ डिंडगो कुट्ठारगेण हणंतो य सयणिज्जं वावाइओ जमलगेण । 'चोरेहिं मारिओ'त्ति कओ कोलाहलो ।
सो उण मरिऊण तस्सेव पुत्तो समुप्पण्णो । आगंतूण निवेइयं जहा – 'अंबे ! चोरेहिं वावाइओ डिंडगो । उम्माहिया संगमा अट्टज्झाणेण मया एसा उप्पण्णा एत्थेव मज्जारिया । जमलगस्स वि पत्तीए जाओ दारगो । कयं वद्धावणयं । अइक्कंतो कोइ कालो । सो य मयहरसूयरो पुव्वब्भासेण निजिक्खुवाडं न मुंचइ त्ति वावाइओ रक्खगेहिं । तम्मंसं चेमं ति पिउमंसं खाइ । सत्तुणो य पुत्तीहूयस्स देइ । माऊए उण मज्जारीहूयाए अट्ठियाणि घल्लेइ'त्ति ।
तओ मए भणियं – 'भयवं ! कहं मुणसि ?' भगवया भणियं - 'सुत्ताइसएण । एसो य एत्थ पच्चओ । "अज्ज तए रयणीए सुविणयंमि निज्जिया वानरा" । तं च जइ सच्चं ता एयं पि' । सोउं चेमं साणुभवं विरत्तोऽहं संसाराओ । साहियमिणं जणणि-जणगाणं । गहिया ते वि संवेगेण । गया सयासं रिसिणो । सुओ धम्मो, परिणओ सव्वेसि । तओऽहं तस्सेव भगवओ सगासे समं जणणि-जणगेहि पव्वइओ । ता एवं साविगे ! मम विसेसकारणं' । सरस्सईए भणियं – 'भयवं ! सोहणं । किं बहुणा? धण्णा तुम'ति ॥छ। बंभवग्गु त्ति गयं ॥छ।
तइएण भणियं - 'साविगे ! सुण जहा पव्वइओऽहमाखंडलो'त्ति ॥छ। आखंडलकहा भण्णइ - 'अहं इओ सत्तमे जम्मे कुणालाविसए कुणालानयरीए अवंतिमाहणस्स पुत्तो आखंडलो नाम
सगळा।
| SR No. | 007109 |
| Book Title | Kahavali Pratham Paricched Part 02 |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2016 |
| Total Pages | 378 |
| Language | Sanskrit |
| Classification | Book_Devnagari |
| File Size | 13 MB |