Page Text
________________
[२५०]
हरेज्ज [नासेज्ज] वा तो तस्स तुमं किं विहेसि ?' सद्दालपुत्तो भणइ – 'बंधेमि मारेमि य' । सामी भणइ – 'जइ भवियव्वया अत्थि तो तुह भंडगाणि न नट्ठाणि । अह नत्थि तो किं चोरेण घाइएणं ?' तओ सोउमेवं सामिस्स सद्दालपुत्तो पडिउत्तरं किंचि काउमसमत्थो संबुद्धो सावओ जाओ । भगवं पि सद्दालपुत्तं संबोहिऊण पुणो वि समोसरिओ सहसंबवणुज्जाणे ।
सद्दालपुत्तो वि संबुद्धो गिहमागंतुं अग्गिमित्तं भणइ - 'भद्देऽहं सावओ जाओ । ता तुमं पि महावीरंतिए गंतुं साविया होहि' । सा वि तव्वयणानंतरं महाविभूईए साविया होऊणाऽऽगया । तओ दो वि पालिंति विहिणा सावगधम्मं । भगवं पि तत्तो विहरिओ देसंतरं ।
तओ गोसालो देसंतरट्ठिओ 'मम मयं मोत्तूण सद्दालपुत्तो सावओ जाओ'त्ति सोउं समागओ सपरिवारो पोलासपुरे । पविसिऊण य कुंभगारअत्थाइ(णि?)याए परिमियपरिवारो गओ सद्दालपुत्तगेहं । तं च विणयपडिवत्तिमकुणमाणं धुत्तत्तणेण भणइ – 'सद्दालपुत्ता ! समोसरिओ एत्थाऽऽसि समणो भगवं ति निसुयमम्हेर्हि' । सद्दालपुत्तो भणइ – 'को सो समणो ? [ताहे गोसालो भणइ] 'जो य केवलनाण-दसणसंपण्णो सो भगवं। ___सद्दालपुत्तो भणइ – “किं समत्था तुब्भे तेण समणेण भगवया महावीरेण सह वायं दाउं ?' गोसालो छइते(ल्ल)त्तणओ भणइ – 'न सक्केमो' । सद्दालपुत्तो भणइ – 'केण कारणेण ?' गोसालो भणइ - 'जह कोइ पुरिसो समत्थो सविण्णाणो य कवोडयाए जीवं घेत्तूण छच्चेविच्छइ तहेव वडवोंछयं करेइ तहा अम्हे वि महावीरेण भगवया लीलाए चेव कवोडयाए तुल्ला वडवोंछीकिज्जामो' । तओ सोउमेवं तुट्ठो सद्दालपुत्तो गोसालं भणइ – 'जइ वि तुब्भमहं न भत्तो तहा वि तुम्हेहिं मम सामी पसंसिओ ता मम सालाए समागंतुं चिट्ठह' । गोसालो वि तहेव काउं लद्धावसरो बहुसो विप्पयारेइ सद्दालपुत्तं । जाहे य मणागं पि सो न चलइ जिणधम्ममग्गाओ ताहे तं मोत्तुमन्नत्थ गओ । अओ परं सद्दालपुत्तो जहा चुलिणिपिया तहा वत्तव्वो जाव महाविदेहे सिज्झिस्सइ ॥छ।७॥ जहा महासयगो । तं जहा -
रायगिहे नयरे सेणिओ राया । तत्थ महासयगो नाम भंडसालिओ । तस्स य परिग्गहे निहाणकलंतर-ववहारविलग्गाओ दम्माण अट्ठट्ठकोडीओ, दसदसगोसहस्सपरिमाणाणि य अट्ठगोउलाणि । तेरस य भज्जाओ रेवईपमुहाओ । तत्थ य रेवईए पेइयसंतियाओ भिन्नाओ चेव दम्माणमट्ठ कोडीओ, दसगोसाहस्सियाणि य अट्ठ गोउलाणि सेसाणं च दुवालसण्हं पेइयसंतिया दम्माणमेगेगा कोडी, दसगोसाहस्सियं च गोउलमेगेगं । समोसरिओ य कयाइ गुणसिलगुजाणे महावीरो । तदंतिए य धम्मं सोऊण महासयगो सावगो जाओ ।
सा य सयगस्स भज्जा रेवई निरंतरं मज्ज-मंसनिरया सुहमप्पणो चेविच्छंती विसप्पओएण दुवालसाऽवि सवक्कीओ माराविऊण तासिं दम्म-गोउलाइपरिग्गहं सयमंगीकाऊण पइणा सह भोगे भुंजइ । अन्नया य कयाइ रायगिहे रण्णा घोसाविया अमारी । रेवई वि मज्ज-मंसं विणा खणं पि चिट्ठिउमसक्कंती नियगोउलियाए सद्दावित्ता पच्छन्नं भणइ – 'मम गोउलेहितो दोहं तरुणकल्होडयाणं मंसं जहा कोइ न जाणइ तहा निच्चं मम संपाडियव्वं' । गोउलियाहिं वि तहेव किज्जते रेवई कल्होडयमंसेसु चेव गिद्धा ।
महासयगो वि सावयत्तणमणुपालिऊण चउद्दससंवच्छराणि जाव, पण्णरसमसंवच्छरे जेट्ठपुत्तं गिहसामियं ठवित्तु पोसाहसालाठिओ निरारंभधम्मपत्ति काउमाढत्तो । सा य रेवई मइरामयवसचलंतगत्ता मयणपरव्वसा
| SR No. | 007109 |
| Book Title | Kahavali Pratham Paricched Part 02 |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2016 |
| Total Pages | 378 |
| Language | Sanskrit |
| Classification | Book_Devnagari |
| File Size | 13 MB |