Page Text
________________
[१३०]
य पाइज्जमाणं कयत्थिज्जमाणमणेगहा पेच्छइ पुरिसमेगं । विसन्नो य भत्त-पाणाणि घेत्तूणाऽऽगओ सामि भणइ – 'को [सो] पुरिसो ?' . सामी भणइ -
'इहेव जंबुद्दीवे भारहे वासे पुरिमताले नयरे निन्नओ नामाऽऽसि अंडवाणियओ । सो य बहूहिं चित्तपुरिसेहिं समप्पियपिडिया-कोदालियाइ-विविहोवगरणेहिं जलचर-थलचर-खचरजीवाणं अंडगाणि निच्चमाणावेइ । तेसिं च काणि वि रसोईए अणेगहा संसकाराविय सयं कुटुंबेणोवजीवइ । सेसाणि पुण विक्किणइ । एवं च सो निन्नओ वाससहस्साऊ बहुपावपूरिओ मरित्तु तइयपुढवीए सत्तसागरोवमाऊ नेरइओ उव्वट्टिऊणिहेव सालाडवीए पल्लीवइस्स खंदसिरीए भज्जाए जाओ गब्भे । तप्पभावेण य तीसे तइयमासे जाओ दोहलओ जहा – धन्नाओ ताओ महिलाओ जाओ सुय-सयण-बंधु-महेलाहिं सहाऽलंकियाओ बहु सुरं पावित्ता मंसं च खाइत्ता पुरिसनेवत्थाओ विविहपहरणेहिं सहियाओ वज्जंतेण गुरूतूरेण अभग्गसेण व्व सालाडवीए हिंडंति । झिज्जंतीए य पुच्छित्तु विजएणाऽविणा(वणी)यदोहलाए जाओ सत्ततीसवासाउओ पुत्तो। पइट्ठिओ य सो दोहलगुद्देसेणं अभग्गसेणो नाम । जाव समत्थीहूओ ताव मओ विजओ । निव्वत्तिएसु य विजयमयकिच्चेसु परिवारेणाऽहिसित्तो अभग्गसेणो पल्लीवई ।
तस्स य ल्ह(ल्ह)संतस्साऽसमंजसेण पुरिमतालुत्तरदिसिं, मिलित्ता देसलोगो गओ महब्बलरायंतिए विन्नवेइ जहा – 'नित्थामा कया देव ! अभग्गसेणेणाऽम्हे । ता तहा करेउ देवो जहा निरुव्विग्गा वसामो, अन्नत्थ वा विसज्जउ' । सोउं चेमं कुविओ महब्बलो दंडं नाम दंडनायगं सद्दित्ता भणइ - 'भो ! अभग्गसेणं बंधित्ता सिग्धं जहा आणेमो तहा कुणसु' । लद्धाएसो य दंडो चलिओ तस्सुवरि बहुसामग्गीए । एत्थंतरंमि हेरिएहिं जणाविओ अभग्गसेणो तज्जित्ता(पल्लिं ता) रक्खाविय पाइएहिं, [सयं पंच]चोरसएहिं निग्गंतुं सालाडवीदुवारे गहियभत्तपाणो ताव ट्ठिओ पच्छन्नो जाव पहुत्तं पारक्कयं । तओ उट्ठिओ सबलो तं दंडबलं खणमेत्तेण हयमहियं काउं पविट्ठो सालाडवीए । दंडो वि पाणसेसो पत्तो पुरिमतालं रन्नो साहइ, जहा – 'देव ! बहुसुहिय-सयण-कोस-धण-धन्नाइसमिद्धो अभग्गसेणो पाणिय-तणाइपउरे तंमि दुग्गे न केणइ घेत्तुं तीरइ'।
तओ रन्ना 'न साम-भेए विणा तस्सऽण्णो गहणोवाओ'त्ति चिंतित्तु कयाइ महारिहपाहुडहत्था पेसिया तदंतिए छइल्लपुरिसा । भणावियं च जहा – 'महाबलेणाऽऽणत्तो सुक्काइनिज्जंतणारहिओ सव्वजणवएसु दसदेवसिओ धम्ममहूसवो । ता समुदाएणापया(पणा)इसु गच्छह निस्संका पुरिमतालं तुब्भे जेण मिलिया खाण-पाण-दाणाइकिच्चं कुणामो जहोचियं । तहा तुम्हाणयणत्थमिहाऽऽगमिस्सइ महब्बलो । गंतुं च रायाचारिएहिं पाहुडाणि समप्पित्ता तहेव भणिए तुट्ठो अभग्गसेणो । निग्गयहणकला(निग्गहणकाल?)चोइओ य सपरिवारो पुरिमतालमागंतुं निव्वियप्पो जावाऽऽसत्तो खाण-पाणाईसु ताव निरुद्धो दुवारे निजंतित्ता महाबलेणाऽऽणत्तो तहा जहा दिवो तए' ।
गोयमो भणइ – 'समा(सामि?)! इओ सो कहं होही ?' सामी भणइ - 'दिणंतिमतिभागे अज्ज सूलिभिन्नो पढमपुढविनेरइओ होउं मियापुत्तो व्व संसारं भमित्ता वाणारसीए सूया(य)रो होही । सो य मारिओ सु(सो)यरिएहिं तत्थेव सेट्ठिपुत्तो सोहम्मे सुरो य होउं महाविदेहे सिज्झिही' जहा सगडो' । तं जहा
| SR No. | 007109 |
| Book Title | Kahavali Pratham Paricched Part 02 |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2016 |
| Total Pages | 378 |
| Language | Sanskrit |
| Classification | Book_Devnagari |
| File Size | 13 MB |