________________
ભૂમિકા
- વિજયશીલચન્દ્રસૂરિ આપણે વિવિધ ગુરુભગવંતોના ગુણાનુવાદ કરી રહ્યા છીએ. પ્રભુના શાસનને પ્રકાશમાન બનાવનારા અને સ્વ અને પરનું કલ્યાણ સાધનારા એવા પૂજ્ય પુરુષોની થોડી થોડી વાતો આપણે કરી રહ્યા છીએ. આજે વાત કરવાની છે મહામંત્રી વસ્તુપાલ અને તેજપાલના ગુરુઓની.
પુણ્યશ્લોક મંત્રીશ્વર વસ્તુપાલ અને એમના નાના ભાઈ મંત્રી તેજપાલ એ બન્ને યુગપ્રભાવક શ્રાવકો – નરરત્નો હતા. એમના પ્રભાવની વાત કરું. સંવત્ ૧૨૯૮ માં મંત્રી વસ્તુપાળનો સ્વર્ગવાસ થયો છે. ત્યાર પછી તેજપાલ મંત્રીએ હિન્દુસ્તાનના સકલ સંઘને ભેગો કર્યો હતો. તેમાં ચૈત્યવાસી અને વસતિવાસી એમ બન્ને પક્ષોના લગભગ ૬૦-૭૦ જેટલા ગચ્છપતિઓને તેમણે ભેગા કર્યા, જેને સંમેલન કહી શકાય. તે વખતે એક ઠરાવ કર્યો. ભારતભરના શ્રીસંઘોનો ઠરાવ !
