________________
બે પુત્ર હતા. દત્ત તેમજ શુભંકર. શુભંકરનાં પત્નીનું નામ હતું - લક્ષ્મીદેવી. તેમને એક પુત્ર હતો - સિદ્ધ - આપણા ચરિત્રનાયક.
અપાર સંપત્તિ છે, સાથે એકનો એક દીકરો હોવાને કારણે સિદ્ધ ખૂબ લાડકોડમાં ઊછરી રહ્યો છે. યુવાનવય થતાં ધન્યા નામની કુલીન - સંસ્કારી કન્યા સાથે લગ્ન કરવામાં આવ્યા છે. સિદ્ધ દૈવી સુખનો અનુભવ કરવા સાથે આનંદથી જીવન પસાર કરી રહ્યો છે.
બન્યું એવું કે એકનો એક દીકરો, અપાર સંપત્તિ, ઘરમાં કોઈ પૂછનાર હતું નહિ. પરિણામે સિદ્ધ જુગાર રમવાની લતે ચડી ગયો. ભાઈ ! યુવાની, સંપત્તિ અને પ્રભુત્વ - આ ત્રણ વાનાં ભેગાં થયા પછી જીવનમાં અનર્થ ન થાય તો જ આશ્ચર્ય.
આપણા સમાજમાં શ્રેષ્ઠીપુત્ર કે ધનિકપુત્રને ખાનદાન, સંસ્કારી માનવામાં આવે છે, પણ તે મોટી ભ્રમણા છે. કહેવાતા ખાનદાન કુટુંબના નબીરાઓએ આ સમાજમાં જેટલી ખાનાખરાબી કરી છે તેટલી ગરીબ ઘરના યુવાનોએ નથી કરી. કારણ કે ગરીબના બાળકોને તો સાંજે શું ખાવું તેની ચિંતા હોય છે જ્યારે શ્રેષ્ઠિપુત્રોને પૈસા ક્યાં નાંખવા તેની ચિંતા હોય છે. તેથી તેમના જાતજાતના મોજશોખો પોષાતા હોય છે.
અહીં મંત્રીપુત્ર સિદ્ધને જુગારનું વ્યસન પ્રતિદિન વધતું જ ગયું. ધીમે ધીમે લાજ-શરમ પણ છૂટી ગઈ. ઉન્માર્ગે ચડેલો સિદ્ધ ખાવાનું, પીવાનું ભૂલ્યો, પરિવારની પ્રતિષ્ઠા સાથે મા-બાપને પણ ભૂલ્યો, હર ક્ષણ પોતાની પ્રતીક્ષામાં ઉજાગરા કરતી રૂપવતી ધન્યાને પણ ભૂલ્યો. ગમે ત્યારે મન થાય ત્યારે ઘરે આવે છે. ૧૧ વાગે૧૨ વાગે તો ક્યારેક ૨ વાગે ઘરે આવે છે. મિત્રો રોકે છે, ટોકે છે. પરંતુ એકવાર ખોટી આદત પડી ગયા પછી તેને છોડવી ખૂબ મુશ્કેલ છે.
