________________
ભૂમિકા
વિજયશીલચન્દ્રસૂરિ દેવાધિદેવ પરમકરુણાનિધાન શ્રીવીરવિભુના લોકોત્તર શાસનને અજવાળનારા – પ્રકાશમાન રાખનારા, રાગ, દ્વેષ અને અજ્ઞાનને આપણાથી વિખૂટા પાડીને આપણને નિરંતર વૈરાગ્ય અને વીતરાગતા તરફ આગળ દોરી જનારા એવા ગુરુ ભગવંતો, શ્રમણ ભગવંતો, આચાર્ય ભગવંતો આ શાસનમાં અસંખ્ય થયા છે. એમનું એક જ મિશન હતું : દયામય ધર્મ બધાને પહોંચાડવો અને રાગ-દ્વેષથી બધાયને ઉગારવા. આ સિવાય એમની પાસે કોઈ લક્ષ્ય ન હતું.
પરંપરામાં આવા અસંખ્ય મહાપુરુષો થયા. એક એક ભગવંતનું ચરિત્ર, એમના પ્રસંગ, એમના જીવનની અદ્ભુત ઘટનાઓની વાત કહો, ત્યારે પ્રશ્ન થાય કે કોની વાત કરવી અને કોને છોડી દેવા? એકની વાત કરીએ તો બીજા એકસો ને એક હજાર રહી જાય છે ! બધાની વાત કેવી રીતે કરી શકાય?
