________________
શંકા-આશંકાથી ઘેરાયેલા એ બ્રાહ્મણોને સાથે લઈને દંડનાયક વિમલ ચંપાના ઝાડ ધરાવતા એ ગિરિપ્રદેશ પાસે પહોંચી ગયા, જ્યાં કંકુનો સ્વસ્તિક અંકિત હોય, એ વૃક્ષ-પ્રદેશ ખોળી કાઢતાં વિમલને વાર ન લાગી. વિમલે સૌને નીચે બેસવાનો ઇશારો કરીને પોતાની વિધિ શરૂ કરી. વિધિના પ્રારંભે ક્ષેત્રદેવતાને બલિ-બાકળા આપીને ખુશ કર્યા બાદ દંડનાયક વિમલે કહ્યું કે, ક્ષેત્રદેવતા ! અમારી પર પ્રસન્ન બનીને આ પૂજા સ્વીકારો, ગઈ કાલે રાતે આપે આપેલા સ્વપ્ન-સંકેત મુજબ અમે અહીં આવ્યા છીએ. અહીં જ, કંકુના સ્વસ્તિકથી અંક્તિ આ વૃક્ષ નીચે આ આબુને જૈન તીર્થ તરીકે પુરવાર કરતા કોઈ પ્રતીકનું જે અસ્તિત્વ સ્વપ્નમાં સૂચિત થયું છે, એ પ્રતીકનાં પુણ્યદર્શન માટે અમે સૌ આતુર છીએ ! ઓ ક્ષેત્રદેવતા અમારી આ મનોકામના પૂર્ણ કરવા વિનંતી !
ચારે તરફ આતુરતાનું મોજું ફરી વળ્યું. બ્રાહ્મણ પૂજારીઓ મનમાં ને મનમાં હસી રહ્યા છે, આ રીતે સ્વપ્નના સંકેતાનુસાર મોટા ઉપાડે આવનારને નિષ્ફળતા મળવામાં કોઈ શંકા રાખવાની હોય જ શાની ?
દંડનાયક વિમલે સ્વસ્તિકાંકિત એ ભૂમિને ખોદાવવા માંડી. થોડા હાથનું ખોદાણ થયું, ત્યાં તો ફૂલ અને ધૂપની અનુપમ સુવાસ અદશ્ય રીતે છૂટવા માંડી. સૌની નાસિકા એ તરફ ખેંચાતી ગઈ. બ્રાહ્મણ પૂજારીઓનાં મોં કાળાશ પકડવા માંડ્યાં. થોડુંક વધુ ખોદાણ થતાં જ પ્રતિમાજીનું અસ્તિત્વ જણાવા માંડ્યું, ચોમેર આતુરતાનું વાતાવરણ ઓર વધુ જામ્યું. ખૂબ જ સાવધાની સાથે થોડુંક વધુ ખોદાણ થતાં જ એક ભવ્ય જિનપ્રતિમાનાં દર્શન થયાં અને સિંહનાદનું સામર્થ્ય ધરાવતા દંડનાયક વિમલના મોંમાંથી “જૈન જયતિ શાસન' નો ધ્વનિ ગુંજી ઊઠ્યો, આસપાસનાં કોતરો અને શિખરોએ જયારે એનો પ્રતિધ્વનિ પાછો પાઠવ્યો, ત્યારે ત્યાં ઉપસ્થિત હજારો બ્રાહ્મણોના સૂર પણ એમની રજા લીધા વિના એ પ્રતિધ્વનિમાં ભળી જઈને એને વધુ પડછંદ બનાવી રહ્યા.
૨૪૦ આબુ તીર્થોદ્ધારક
