________________
સાધુઓના વેશ કલ્કિ છીનવી લેશે. આ વખતે સાધુઓના અગ્રણી રાજાને સમજાવશે કે, અમે તો અકિંચન છીએ, અમારી પાસે એવી કઈ ચીજ છે કે, જે કર રૂપે આપી શકાય !
આ સમજાવટની કલ્કિ પર કંઈ જ અસર નહિ થાય, ત્યારે મહાજન પણ સમજાવવામાં બાકી નહિ રાખે. પરંતુ સાધુઓને કેદ-મુક્ત કરવા કલ્કિ તૈયાર નહિ જ થાય, ત્યારે નગરદેવતા કલ્કિની ખબર લેતા પુણ્યપ્રકોપ ઠાલવશે કે, રાજા ! તે આ શો અન્યાય કરવા માંડ્યો છે ! સાધુ-શ્રમણો પાસેથી વળી કર લેવાનો હોય અને એમને જેલના સળિયા પાછળ ધકેલવાના હોય? તું સમજી જા, નહિ તો આ અન્યાય-અનીતિનું આખરી પરિણામ ભોગવવા માટે તૈયાર થઈ જા !
નગરદેવતાનો આવો પુણ્યપ્રકોપ જોઈને કલ્કિ કેદી બનાવેલા સાધુઓના પગ પકડીને વિનવશે કે, ભગવન્! કોપ જોઈ લીધો, હવે કૃપાની કામના સાથે હું આપના ચરણની ચાકરી ચાહું છું ! ભીનાવસ્ત્રો પહેરીને આ રીતે શરણાગત બનેલા કલ્કિની ભાવદયા ચિતવતા ઘણા સાધુઓ આ બનાવ પછી મગધનો ત્યાગ કરી દેશે. કારણ કે હવે પછી થનારા ગંગાના જલપ્રલય અંગેની આગાહી એમને સચોટ-સિદ્ધ થનારી પ્રતીત થશે.
આમ, નગરદેવતાની દરમિયાનગીરીથી પાટલિપુત્ર કલ્કિના ઉપદ્રવોમાંથી તો મુક્ત થઈ જશે. પણ નજીકના કાળમાં જ થનારા ગંગાપ્રલયની સર્વભક્ષી તારાજીમાંથી તો લગભગ કોઈ જ બચી નહિ શકે ! આ તારાજીના સૂચક ભૂમિ અને આકાશ સંબંધી અનેક ઉત્પાતોથી જ્ઞાની સાધુઓને એવું જ્ઞાન થઈ જશે કે, સાંવત્સરિક પારણાના દિવસે ભયંકરપ્રલય થવાનો છે ! એથી ઘણા સાધુઓ ચોમાસામાં જ પાટલિપુત્રથી વિહાર કરી જશે. છતાં પણ ઉપકરણો, ઉપાશ્રયો અને ભક્તોના રાગથી બંધાઈને થોડા ઘણા સાધુઓ અને ઘરબારના પ્રેમી શ્રાવકો પાટલિપુત્રનો પરિત્યાગ નહિ કરે.
- મહારાજા ખારવેલ
