________________
જૈનશાસનના જ્યોતિર્ધરો ભાગ-૧
[
૧૨૦
ચિંતામણી પાર્શ્વનાથ પ્રભુનું એક જિનમંદિર તો જૈનશાસનની જયપતાકા ફરકાવતું અડીખમ જ રહ્યું. કાળક્રમે એનો જીર્ણોદ્વાર જરૂરી જણાતાં અને ભૂગર્ભમાં જિનબિંબો હોવાના સંકેત સ્વપ્ન દ્વારા મળતા રહેવાના કારણે સંઘે જીર્ણોદ્ધારનું કાર્ય સંવત ૧૯૪૯માં આરંભ્યું ત્યારે ભૂગર્ભમાંથી શ્રી શાંતિનાથ પ્રભુજી આદિ ૧૩ જિનબિંબો પ્રાપ્ત થતા સ્વપ્ન તથા જીર્ણોદ્ધારના નિર્ણયની સાર્થકતા અનુભવતા સંઘના હર્ષોલ્લાસમાં ભરતી આવવા પામી. ચોતરફથી દર્શનાર્થે ભાવિકોનો ધસારો થતા બરલૂટનો મહિમા ઓર વૃદ્ધિંગત બન્યો.
જીર્ણોદ્ધાર સમયે પ્રાપ્ત જિનબિંબોને શ્રી શાંતિનાથ પ્રભુજીનું અલગ જિનમંદિર નિર્મિત કરીને એમાં પ્રતિષ્ઠિત કરવાના નિર્ણય મુજબ સંવત ૧૯૬૪ના પૂ. મુનિરાજશ્રી ધનવિજયજી મ.ની નિશ્રામાં પ્રતિષ્ઠાવિધિ થઈ. એ સમયે પ્રતિષ્ઠિત ભૂગર્ભ-પ્રાપ્ત એ જિન-પ્રતિમાઓમાંથી એક પ્રતિમાજી કુમારપાળ દ્વારા નિર્મિત અને કલિકાલસર્વજ્ઞ શ્રી હેમચન્દ્રાચાર્યજી દ્વારા વિક્રમ સંવત ૧૨૧૬માં પ્રાણપ્રતિષ્ઠિત થયાનો શિલાલેખ એ મૂર્તિ પર આજેય વાચવા મળે છે. આવા જિનબિંબો જવલ્લે જ જોવા મળે છે. આ પછી વર્ષો બાદ શિખરનો જીર્ણોદ્ધાર થતા ધ્વજદંડની પુનઃપ્રતિષ્ઠા તપસ્વીસમ્રાટ વર્ધમાનતપ પ્રભાવક પૂ.આ.શ્રી રાજતિલકસૂરિજી મહારાજાની નિશ્રામાં વિ.સં. ૨૦૪૦માં ઉજવાઈ. આમ, બરલૂટ ગામ ઇતિહાસનાં પાને વીરવિભુની વિચરણભૂમિ તરીકે
અંકિત છે.