________________
(૨૯) પર્યુષણના આઠેય દિવસ પાંખી પાળતા
હરિજન કાંયાભાઇ લાખાભાઇ કચ્છકેસરી, અચલગચ્છાધિપતિ પ.પૂ. આચાર્ય ભગવંત શ્રીગુણસાગરસૂરીશ્વરજી મ.સા.ના સમુદાયના સા. શ્રી પૂર્ણાનંદશ્રીજીના કચ્છ – બિદડા ગામ (તા. માંડવી-કચ્છ (ગુજ.) પીનઃ૩૭૦૪૩૫) માં થયેલ ચાતુર્માસ દરમ્યાન તેમના સત્સંગ દ્વારા છેલ્લા સાત વર્ષથી જૈન ધર્મની આરાધના કરતા હરિજન કાંયાભાઈ (ઉ.વ.૬૭) નું જીવન ખરેખર ખૂબજ પ્રેરણાદાયક તથા અનુમોદનીય છે.
સં.૨૦૪૮ માં અમારુ ચાતુર્માસ બિદડામાં થતાં કાંયાભાઈના જીવનને નજીકથી નિહાળવાનો અવસર સાંપડયો.
ચાતુર્માસ દરમ્યાન દરરોજ બે ટાઇમ વ્યાખ્યાનમાં નિયમિત આવતા. વ્યાખ્યાનમાં દરરોજ સામાયિક લઈને બેસવાની પ્રેરણાનો એમણે તાત્કાલિક અમલ કર્યો. દરરોજ દેવસિક પ્રતિક્રમણ પણ નિયમિત કરતા.
રોજ દેરાસરમાં જઇને પ્રભુદર્શન કરી દેરાસરના ભંડારમાં યથાશક્તિ દ્રવ્ય અચૂક નાખે.
ક્વચિત્ અનિવાર્ય સંયોગવશાત્ સવારનાં ગુરૂવંદન ન થઈ શક્યા હોય તો છેવટે રાત્રે સૂતા પહેલાં તો અચૂક ઉપાશ્રયે આવીને ત્રિકાલ વંદના કરે જ.
- ચાતુર્માસ દરમ્યાન પ્રાયઃ દરેક સામુદાયિક તપશ્ચર્યામાં તેમનું નામ અચૂક હોય જ. વર્ધમાન આયંબિલ તપનો ઘડો(પાયો) બાંધ્યો. અટ્ટમ કર્યો. તથા મસ્તકના વાળનો લોચ પણ હોંશપૂર્વક કરાવ્યો.
પર્યુષણના આઠે દિવસ પાંખી પાળે.ખેતરે જાય નહીં. ઘરના કોઈ પણ સભ્ય અભક્ષ્ય ભક્ષણ ન કરે.
પર્યુષણ બાદ પોતાના ઉપકારી સાધુ-સાધ્વીજી ભગવંતો નજીકના કે દૂરના ગામોમાં જ્યાં બિરાજમાન હોય ત્યાં વંદન કરવા જાય.
સંઘ સાથે પાલિતાણા, આબુ, શંખેશ્વર, ભદ્રેશ્વર, સુથરી આદિ અનેક તીર્થોની યાત્રા કરી.
บบ
