________________
(૧૦) અનાનુપૂર્વથી નિયમિત નવકાર ગણતા
જાડેજા કરસનજી હાજાજી
કચ્છ-માંડવી તાલુકાના ડુમરા ગામમાં સં. ૨૦૪૭માં અચલગચ્છીય સા.શ્રી સુરેન્દ્રશ્રીજી આદિનું ચાર્તુમાસ થયું. તે વખતે તેમના સત્સંગથી કરસનજી જાડેજા (ઉં.વ. ૬૫) જૈનધર્મ પામ્યા. એ ચાર્તુમાસમાં તેમણે અઠ્ઠાઇ કરી તથા જિનપૂજા, ચોવિહાર વિગેરે આરાધનાનો પ્રારંભ કર્યો. ત્યારથી માંડીને દરેક ચાતુર્માસમાં કરાવાતી નાની મોટી દરેક તપશ્ચર્યા તથા આરાધનામાં અનુકૂળતા મુજબ જોડાય છે. સં.૨૦૪૯માં સમવસરણતપ પણ કરેલ. ભુજથી શંખેશ્વરના છ'રી પાળતા સંઘમાં યાત્રિક તરીકે જોડાયેલ. સમેતશિખરજી, પાલિતાણા, આદિ અનેક જૈન તીર્થોની યાત્રા કરી છે.
તેઓ દરરોજ અનાનુપૂર્વી દ્વારા નવકાર જાપ કરે છે. અનાનુપૂર્વીની પુસ્તિકામાં એક થી નવ સુધીના આંકડા આડા અવળા ક્રમમાં લખેલા હોય છે. તેમાં એક પછી એક જે આંકડા લખેલ હોય તેટલા નંબરનો નવકાર મહામંત્રનો પદ મનમાં બોલવાનો હોય છે. દા.ત. ૩ લખેલ હોય તો નવકારનું ત્રીજુ પદ 'નમો આયરિયાણં' બોલવું અને ૭ લખેલ હોય તો સાતમું પદ 'સવ્વપાવપ્પણાસણો' બોલવું. આનાથી ચિત્તની ચંચળતા ઓછી થાય છે.
