________________
मूल सूत्र
२३
सच्चित्ते पडिबद्धे, अपोल-दुप्पोलिअंच आहारे । तुच्छोसहि-भक्खणया, पडिक्कमे देसिअं(राइअं) सव्वं ।।२१।। इंगाली-वण-साडी-भाडी-फोडी सुवज्जए कम्मं । वाणिज्जं चेव दंत-लक्ख-रस-केस-विस-विसयं ।।२२।। एवं खु जंतपीलण(पिल्लण)-कम्मं निलंछणं च दवदाणं । सर-दह-तलाय-सोसं, असई-पोसं च वज्जिज्जा ।।२३।। सत्थग्गि-मुसल-जंतग-तण-कढे मंत-मूल-भेसज्जे । दिन्ने दवाविए वा, पडिक्कमे देसिअं(राइअं) सव्वं ।।२४ ।। पहाणुव्वट्टण-वनग-विलेवणे सद्द-रूव-रस-गंधे । वत्थासण-आभरणे, पडिक्कमे देसिअं(राइअं) सव्वं ।।२५।। कंदप्पे कुक्कुइए, मोहरि-अहिगरण-भोग-अइरित्ते । दंडंमि अणट्ठाए, तइअंमि गुणव्वए निंदे ।।२६।। तिविहे दुप्पणिहाणे, अणवट्ठाणे तहा सइविहूणे । सामाइअ(ए) वितहकए, पढमे सिक्खावए निंदे ।।२७।। आणवणे पेसवणे, सद्दे रूवे अ पुग्गलक्खेवे । देसावगासिअम्मी, बीए सिक्खावए निंदे ।।२८।। संथारुच्चारविही, पमाय तह चेव भोयणाभोए । पोसहविहि-विवरीए, तइए सिक्खावए निंदे ।।२९।। सञ्चित्ते निक्खिवणे, पिहिणे ववएस-मच्छरे चेव । कालाइक्कमदाणे, चउत्थे सिक्खावए निंदे ।।३० ।। सुहिएसु अ दुहिएसु अ, जा मे अस्संजएसु अणुकंपा । रागेण व दोसेण व, तं निंदे तं च गरिहामि ।।३१।। साहूसु संविभागो, न कओ तव-चरण-करण-जुत्तेसु । संते फासुअदाणे, तं निंदे तं च गरिहामि ।।३२।।
