________________
શ્રુતધર પરમ્પરાના ઉજ્જવલ નક્ષત્રઃ પૂજ્ય શ્રીજબૂવિજયજી મહારાજ
-પૂ. ઉપાધ્યાયશ્રી ભુવનચંદ્ર મ.સા.
| પૂજ્યશ્રીજબૂવિજયજી મહારાજ શ્રુતધર પરમ્પરાના એક ઉજ્જવલ નક્ષત્ર હતા. ૮૭ વર્ષની પરિપક્વવયે પણ તેઓશ્રી કલાકો સુધી હસ્તપ્રતોનું વાંચન કરતા. મહિને મહિને અટ્ટમનો તપ કરતા. જૈન વિદ્યાના અભ્યાસી દેશી-વિદેશી વિદ્યાર્થીઓને
માર્ગદર્શન આપતા. વિહાર, જીવદયાની પ્રવૃત્તિ, શિષ્યોનું અધ્યાપન, કલાકો સુધી જાપ, વિવિધ ભાષાઓનો નિરન્તર નૂતન અભ્યાસ, જ્ઞાન-ભંડારોનો ઉદ્ધાર, કેપ્યુટરીકરણ - આવી વિવિધ
કામગીરી અપ્રમત્તભાવે અન્તિમ ક્ષણ સુધી કરનારા પૂજ્ય શ્રુતસ્થવિર મુનિપ્રવર એક અનાડી માણસની ભૂલનો ભોગ બની અદૃશ્ય થયા. એક કર્મઠ, તપસ્વી, શ્રુતસ્થવિર પ્રતિભા સંઘ પાસેથી ક્ષણવારમાં છીનવાઈ ગઈ. વિધિની વક્રતાનું જાણે પ્રત્યક્ષ નિદર્શન !
પૂજ્યશ્રીના મુખે સાંભળ્યું હતું : હવે તો બોનસનાં વર્ષો છે. થાય એટલું કરી લેવું છે. અને અક્ષરશઃ એ જ રીતે છેલ્લાં થોડાં વર્ષો તેઓશ્રીએ ગાળ્યાં. પૂજ્ય મહારાજ સાહેબ પુરુષાર્થસભર, જ્ઞાનસાધનસભર, પરોપકારસભર જીવન જીવી સ્વનામધન્ય બની ગયા છે. દુર્ઘટના અસહ્ય છે, કિન્તુ તેઓશ્રીને આથી કોઈ હાનિ નથી થઈ, સંઘને થઇ છે. એમનાં અધૂરાં રહેલાં અને વાટ જોઈ રહેલાં અનેક કાર્યો હવે કોણ કરશે એ પ્રશ્ન છે.
પૂજ્ય શ્રુતસ્થવિર શ્રમણશ્રેષ્ઠના જીવન અને કાર્યમાંથી પ્રેરણા લઈ શ્રમણસંઘનો એક ટકો શ્રમણવર્ગ પણ સંશોધનનિષ્ઠા કેળવે અને આ દીર્ઘ પરિશ્રમસાધ્ય ક્ષેત્રને પોતાના સમયશક્તિ અર્પણ કરવાનું પસંદ કરે તો જ શ્રતધરોની પરમ્પરા પ્રવર્તમાન રહી શકે. ઇચ્છીએ કે આવું કંઈક બને.
