________________
પ્રસંગ પંચામૃત
-પૂ. આ.શ્રી મુનિચન્દ્રસૂરિ મહારાજ
(૧)
પૂજ્યશ્રી જંબૂવિજયજી મહારાજ વર્ષો સુધી શંખેશ્વર અને શંખેશ્વરની આજુ-બાજુના ગામોમાં વિચર્યા. ચાતુર્માસો કર્યા. પૂજ્યશ્રીના હૃદયમાં શંખેશ્વર પાર્શ્વનાથ ભગવાન પ્રત્યે અપાર શ્રદ્ધા - અપાર ભક્તિ હતી. ઘણીવાર વિચાર આવે, આનું કારણ શું ? પૂજ્યશ્રીના જીવનમાં ડોકિયું કરતું આનો જવાબ જડી આવે છે.
પૂજ્યશ્રી પરમ ગુરુભક્ત હતા. તેમના પિતાશ્રી પૂ. મુનિરાજશ્રી ભુવનવિજયજી મહારાજ એ જ એમના ગુરુદેવ હતા. વર્ષો સુધી તેઓ એમની છાયામાં એમની આજ્ઞામાં રહ્યા. ગુરુઆજ્ઞા એ જ એમનો જીવનમંત્ર હતો.
શંખેશ્વરતીર્થમાં પૂ. ભુવનવિજયજી મહારાજની અંતિમ ક્ષણો નજીક આવી. ગુરુદેવના વિયોગે પૂ. જંબૂવિજયજી મહારાજ અત્યંત વિહ્વળ બની ગયા. એમણે એમના ગુરુદેવને પૂછ્યું ઃ ગુરુદેવ ! મારું હવે કોણ ? આ પ્રશ્ન પાછળ એમનો આશય એ હતો... હવે મારું યોગ-ક્ષેમ કોણ કરશે ? એ વખતે પૂજ્યશ્રી ભુવનવિજયજી મહારાજે શંખેશ્વર પાર્શ્વનાથદાદાની ધજા તરફ ઇશારો કર્યો. એ દિવસથી પૂ. જંબૂવિજયજી મહારાજે શંખેશ્વરદાદાને પોતાનું જીવનસર્વસ્વ માની લીધું. પૂ. પિતાજી મહારાજના કાળધર્મ બાદ જ્યારે પણ તેઓશ્રી શંખેશ્વર પધારતા ત્યારે એ જ રૂમમાં તેઓ ઉતરતા જ્યાં એમના ગુરુદેવે અંતિમશ્વાસ લીધા હતા.
૧૧
