________________
ઉપકાર સ્મૃતિ
પરમારાઘ્યપાદ સુવિશાલ ગચ્છાધિપતિ પ.પૂ.આ.ભ.શ્રી રામચન્દ્રસૂરીશ્વરજી મહારાજા, નમસ્કાર મહામંત્રસ્મારક પ.પૂ.પં.શ્રી ભદ્રંકરવિજયજી ગણિવર્ય તથા મધુરભાષી પ.પૂ.આ.ભ.શ્રી જિનપ્રભસૂરીશ્વરજી મહારાજા જેવા સિદ્ધાંતનિષ્ઠ અને પ્રભાવક મહાપુરુષોની પરંપરા મળવાના કારણે સન્માર્ગની પ્રાપ્તિ થઈ શકી એ બદલ એ ઉપકારી શ્રેણીના ચરણોમાં નતમસ્તક વંદન કરું છું.
ત્યાગી-તપસ્વી પ.પૂ.મુનિરાજ શ્રીવારિપેણવિજયજી મ.સા.નું ઉત્તમ ચારિત્ર અને નિર્દોષ ચર્ચાએ અમને ઉત્તમ ચારિત્રનું પ્રેરણા પાથેય પૂરું પાડ્યું એ બદલ તેમના ઉપકારને આ ક્ષણે સ્મરણ કરું છું.
જેમની કૃપાવૃષ્ટિ અમારા ઉપર નિરંતર વરસતી રહે છે, જેઓ સદાને માટે અમારું હિત ચિંતવે છે, જેઓશ્રી અમારા છત્રછાયારૂપ છે એવા મોટા ગુરુમહારાજ પ.પૂ.પં.શ્રીયુગપ્રભવિજયજી મ.સા.ના ચરણારવિંદે કોટી વંદન.
જેમની નિગરાણી હેઠળ મારું જીવન ઘડતર થયું છે, અદ્યાવિધ મારો શાસ્ત્રાભ્યાસ જેમની નિશ્રાએ થયો છે, જેઓશ્રી સદાને માટે મારા ગુણવિકાસની ચિંતા કરનારા છે તથા આ પુસ્તિકાના લખાણમાં મને જેમની સતત સહાય પ્રાપ્ત થઈ છે એવા અનેક શિષ્યોના યોગક્ષેમકર્તા પ.પૂ. ગુરુદેવ ગણિવર્ય શ્રીસંયમપ્રભવિજયજી મ.સા.ના ચરણ કમલમાં શત શત વંદન.
