________________
તીર્થમાલા
૯૧
અત્યારે એ ગોડીજી ભગવાનની મૂર્તિ ગોરજીના ઉપાશ્રયની બાજુના મંદિરમાંથી લઈ ગામની વચ્ચે નવા કરાયેલ જિનમંદિરમાં મૂળનાયક તરીકે પ્રતિષ્ઠા કરાયેલ છે. ગોડીજી ભગવાનના યક્ષના નામે ઓળખાતી એક પાર્શ્વયક્ષની મૂર્તિ પણ હવે ગોડીજી ભ.ના જિનાલયમાં બિરાજમાન છે.
શ્રી ગોડીપાર્શ્વનાથ ઉત્પત્તિ ગર્ભિત મેઘા-કાજળના ઢાળીયામાં આવતા વર્ષ માસ તિથિ અને નિર્માતાના નામ સાથે વાવમાં વર્તમાનમાં બિરાજમાન શ્રી ગોડી પાર્શ્વનાથની મૂર્તિ પરનો શિલાલેખ અદ્ભૂત સામ્ય ધરાવે છે.
વાવમાં બિરાજમાન શ્રી ગોડી પાર્શ્વનાથ પ્રભુની ઊંચાઈ પણ દોઢ ફૂટ છે. પૂર્વોક્ત ઉલ્લેખ તે મૂળ શ્રી ગોડી પાર્શ્વનાથની મૂર્તિ પણ દોઢ ફૂટ ઊંચી હોવાનું જણાવે છે.
વાવની ગોડી ગામથી ભૌગોલિક નિકટતા અને બન્ને પ્રદેશ વચ્ચેના તે કાળમાં ચાલતાં પુષ્કળ વ્યાપાર-વ્યવહાર સંબંધી મળતી ઐતિહાસિક વિગતો પણ ઉપરોક્ત ઉલ્લેખોનું સમર્થન કરે છે.
તેથી વાવમાં બિરાજમાન શ્રી ગોડી પાર્શ્વનાથ પ્રભુ તે વિલુપ્ત મનાતા મૂળ શ્રી ગોડી પાર્શ્વનાથ પ્રભુ જ છે, તે હવે નિઃશંક અને નિર્વિવાદ પૂરવાર થાય છે.
અચલગચ્છના શ્રી મહેન્દ્રસૂરિની શાખામાં થયેલ અભયસિંહ આચાર્યના ઉપદેશથી મીઠડીયા ગોત્રના ઓસવાળવંશી પાટણનિવાસી મેઘાશાએ સં. ૧૪૩૨ના ફાગણ સુદ-૨ ભૃગુવારે પોતાના પિતા ખેતા અને માતા નોડિના શ્રેયાર્થે આ શ્રી ગોડી પાર્શ્વનાથનું બિંબ ભરાવ્યું હતું.
