________________
શ્રી ગોડીજી પાર્શ્વનાથનો ઇતિહાસ
નગર પારકરથી લગભગ ૫૦ માઈલ દૂર અને ગઢરા. રોડથી ૭૦-૮૦ માઈલ દૂર “ગોડીમંદિર' નામનું એક ગામ છે. અત્યારે ત્યાં માત્ર ભીલોની વસતિ છે. શીખરબંધી ગોડીજીનું મંદિર છે. મૂર્તિ વગેરે કંઈ નથી. મંદિર જીર્ણ-શીર્ણ થઈ ગયું છે.
સત્તરમી સદીના બનેલા એક જીવનમાં સુરતથી એક સંઘ નીકળ્યાનું વર્ણન છે. સંઘ અહમદાવાદ, આબુ, શંખેશ્વર અને રાધનપુર થઈ, સોઈગામ (સૂઈગામ) કે જે સિંધમાં જવા માટે ગુજરાતના નાકા ઉપર છેલ્લું ગામ છે. ત્યાંથી પણ ઉતરીને સિંધ તરફ તે સંઘ ગયો હતો. પરંતુ ત્યાંથી આગળ વધવું ઘણું જ કઠિન લાગવાથી ત્યાં જ ગોડીજીની ભાવપૂર્વક સ્તુતિ કરી, ગોડીજી પાર્શ્વનાથે સંઘને ત્યાં દર્શન દીધા. સંઘ ખુશી થયો. ચાર દિવસ ત્યાં મુકામ રાખી ઉત્સવ કરી પીલુડીના ઝાડ નીચે ગોડીજીના પગલાં સ્થાપી સંઘ પાછો રાધનપુર ગયો.
ગોડીપુરનું ખાસ વર્ણન જોવામાં આવ્યું નથી. પરંતુ સ્તવનાદિમાં “ગોડીગ્રામ' એવો શબ્દપ્રયોગ આવે છે. એટલે તે એક નાનું ગામડું હશે. એમ સમજાય છે. વળી તે અંગેની પ્રચલિત કથા પણ તે નાનું ગામ હોવાનો નિર્દેશ કરે છે. નામની સુંદરતા ખાતર નાના ગામોને પણ “પુર' શબ્દ લગાડવામાં આવે છે.
ગોડીપુર રણકિનારે આવેલું એક નાનું ગામડું હતું. એટલે ત્યાં પાણીની તંગી હોય તે સ્વાભાવિક છે. આ તંગી નિવારવાને મેઘાશાએ ત્યાં વાવ બંધાવી હતી અને તેમાં મીઠું પાણી નિકળ્યું હતું.
