________________
શ્રી રણછોડદાસજી બાપુ-ચિત્રકૂટ ખંડપ્રલય, કોયનાનો ધરતીકંપ એનાં સાક્ષી છે.
દેશના કોઈ પણ ભાગમાં દુષ્કાળ પડ્યે શ્રી ગુરુદેવ હાથમાં કમંડળ લઈને પહોંચ્યા જ હોય. નવી ફસલ ન આવે ત્યાં સુધી રસોડે આવનાર પ્રત્યેકને પ્રેમપૂર્વક જમાડે, પછી ભલે ને એમની સંખ્યા હજારોનો આંક વટાવી જાય.
ભરતપુર અને દક્ષિણ ગુજરાતના ખંડપ્રલય સમયે જરૂરતવાળા લોકોને કપડાં, વાસણ, કાચું અનાજ, ઘરવપરાશની ચીજો વગેરે પૂરાં પાડવામાં પણ એમણે પાછી પાની ન કરી.
કોયનામાં ધરતીકંપે હાહાકાર ફેલાવ્યો ત્યારેય આ મહાપુરુષે બેઘર બનેલા લોકો માટે નવી વસાહત બાંધી આપવાની ભક્તોને પ્રેરણા આપી. સૂસવતી હવા અને ચાલુ રહેલા ધરતીકંપના હળવા આંચકા વચ્ચે રહીને જાનની પણ પરવા કર્યા વિના એ સહુ નિષ્ઠાવાન શિષ્યોએ પાંચસો જેટલાં નવાં ઘર બનાવી આપ્યાં.
પરમાર્થકાર્યો અને સેવા શિષ્યોને અહંકારી ન બનાવી મૂકે એ માટે તેઓ હંમેશાં સાવધાન કરતા ને કહેતા: ‘આ દુ: ખી, અસહાય અને જરૂરિયાતવાળા લોકો આપણા પર ઉપકાર કરીને પોતાની સેવા કરવાનો આપણને મોકો આપે છે. આપણે એટલે જ કાર્ય કરી શકીએ છીએ. એ લોકો જમવા ન આવે, નેત્રયજ્ઞમાં ઑપરેશન કરાવવા ન આવે અથવા આપણું કશુંય ગ્રહણ ન કરે તો આપણે કેવી રીતે કોની સેવા કરવાના હતા ? એટલે આપણે ઊલટો તેઓનો આભાર માનવો જોઈએ. હકીકતમાં હું પોતે આને કોઈ સારું કામ નથી સમજતો. ભગવાનને તમે પ્રાર્થના કરો કે દેશમાં પ્રકૃતિજનિત કોઈ આપત્તિ આવે જ નહીં જેથી આપણે બીજાં સત્કાર્યો કરી શકીએ.''