________________
માનવતાની એ ઊંચાઈએ પહોંચાડવાનું ભગીરથ કાર્ય સામે પડ્યું છે, એ પડકાર શું પ્રેરણા નથી આપતો ?
મારા આંગણાના પારિજાતના ઝાડ નીચે રોજ સવારે ખરતાં ફૂલમાં મને ઊઘડતા પ્રભાતનાં દર્શન થાય છે. એ જ રીતે ક્રૂસના થાંભલા નીચે ટપકતાં રક્તબિન્દુઓમાં પણ ઊઘડતા પ્રભાતનું દર્શન થાય છે, અને યુગે યુગે અવતરેલા હરિના લાલનું ગાણું સંભળાય છે કે: ‘‘ચરણો આ ચાલ્યાં રે મરણિયા માગે
બખ્તર બાંધ્યાં બેહદ સબૂરીને નામ, અંજવાળાં એવાં તો ઉતાર્યા હરિનાં હેતથી.
કે કાળી કાળી ખીણું બની હરિનો મુકામ....'
પ્રેમનો ઉપકાર
આ પુસ્તકમાં ઈશુનો સંદેશ છે. ઈશુના સંદેશમાં પ્રેમ છે. માણસ માણસ વચ્ચેનો પ્રેમ. મિત્રને માટે પ્રેમ. દુશ્મનને માટે પ્રેમ. પ્રેમનું સામ્રાજ્ય છે. આપણા યુગને એ પ્રેમની જરૂર છે. માટે ઈશુની જરૂર છે.
એમાં આ પુસ્તકની ઉપકારકતા છે. તા. ૨૮-૩-'૮૩
– ફાધર વાલેસ
