________________
આ બાજુ ડુંગર ઉપર કડીઆ વિગેરેએ જઈ કામની શરૂઆત કરી છે થોડો પાયો પણ ખોદ્યો. અને હવે ચૂનો પાથરી પથરાઓ ગોઠવવાની શરૂઆત કરતા હતા ત્યાં ગાળીમાંથી એક જુવાન કામળીઓ ડાંગ લઈને આવ્યો અને ચણતર ઊપર સૂઈ ગયો અને જોરથી બોલવા માંડ્યો કે અમારા બકરા કાપવા અમો અહીં કાંઈપણ થવા દઈશું નહીં, આમ
જ્યાં બોલે છે ત્યાં દરબારના એ પટાવાળાઓએ એ કામળીઆના જુવાનને ઢસડી આઘો કર્યો. બસ થઈ રહ્યું દારૂમાં ચિનગારી પડી. એ જોરજોરથી મોટેમોટેથી રાડો પાડવા લાગ્યો, બચાવો બચાવો મને મારી નાંખ્યો, આ અવાજ થતાં જ ગાળીમાંથી બધાય કામળીઆ લાકડીઓ કડીયાળી ડાંગો સાથે બહાર આવી ગયા અને તૂટી પડ્યા એ કડીઆ અને દરબારના માણસો ઉપર. થઈ ગયું જબરું ધીંગાણું. સંખ્યાબળ જોઈ એ બધાય ભાગી ગયા. કામળીઆઓએ કતલખાનું બાંધવા લાવેલ બધોય સરસામાન ડુંગરની ખીણમાં આમતેમ ફેંકી દીધો. સરસામાનનું નામનિશાન પણ ન જ રહેવા દીધું. પ્રથમ તબક્કો ઓપરેશન બ્લ્યુસ્ટારનો પૂરો થયો.
વાયુવેગે ગામમાં સમાચારો ફરી વળ્યા કે ડુંગર ઉપર તોફાન થયું છે. હવેલીએ બધાય સમાચારો આવતા હતા. પૂ.શ્રીએ સાગરજી મહારાજ અને મણિવિજયજી મહારાજ સાથે ભેગા મળી વિચાર વિનિમય કર્યો. આ બધાય પરિણામ લક્ષી હતા. પૂ.શ્રીએ રજુઆત કરી કે ઠાકોર સાહેબ ગારિયાધાર છે. દિવાન જરૂર રીપોર્ટ મોકલશે જ. શું રિપોર્ટ મોકલશે એ જાણવું જરૂરી હતું અને એ માટે પૂ.શ્રીએ પäત્ર રચ્યું.
પૂ.શ્રી ના એક અનન્ય ભક્ત અમદાવાદના પાડાપોળના ગોકલદાસ આમથા શાહ હતા.એ એ વખતના મેટ્રિક પાસ એ સમયનું મેટ્રિક એટલે - આજના એમ.એ. પણ એની આગળ પાણી ભરે. એ ઘણા જ બાહોશ છે
