________________
ગુજરાતના જાહેર જીવનમાં મારું જે અલ્પ સ્થાન છે તેને લક્ષ્યમાં લઈને મારે કહેવું જોઈએ કે શ્રીમદ્ રાજચંદ્ર ગ્રંથને એક આદર્શરૂપે રાખવામાં આવે તો તેના ઉપાસકોને અત્યંત લાભ થયા વિના રહે નહિ. એ ગ્રંથમાં તત્વજ્ઞાનના ઝરણા વહ્યા કરે છે. એ ગ્રંથ કોઈ ધર્મનો વિરોધી નથી કારણ કે તેની શૈલી બહુ ગંભીર પ્રકારની છે.
– આચાર્ય આનંદશંકર બાબુભાઈ ધ્રુવ
જયંતિ પ્રવચનમાંથી
કવિશ્રીના જીવનના ઉચ્ચ આશય તેમના લેખમાંથી મળી આવતા ઉચ્ચ વિચારો સ્વીકારવાલાયક શિખામણના વચનો અને સ્તુત્ય તથા ફિલસુફીથી ભરપૂર સિદ્ધાંતો એકલા જૈન સમૂહને જ ઉપયોગી છે એમ નથી, પરંતુ તે સર્વમાન્ય છે અને એ સર્વમાન્યતાને લીધે તે જેમ વિશેષ પ્રસિદ્ધિમાં આવે તો
સારૂં.
– દી. બ. કૃષ્ણલાલ મોહનલાલ ઝવેરી શ્રીમદ્ રાજચંદ્ર જયંતિ, કાર્તિક પૂર્ણિમા સં. ૧૯૬૬, મુંબઈ
શ્રીમના પ્રત્યક્ષ સમાગમનો લાભ મને નથી મળ્યો. પણ તેમના કેટલાંક લખાણો વાંચવા પ્રેરાયો. આ લખાણો એવા સ્વરૂપના છે કે જેવા મેં અન્ય કોઈને વિષે જાણતા નથી. કોઈ દેહીની પોતાની આત્મસાધનાની આવી રોજનીશી જેમાં આત્મજ્ઞાનની ધગશ, તે તરફ થતી પ્રગતિ, તેમાં આવતા વિદ્ગો, ચમત્કાર સમા સાક્ષાત્કારો આવી સળંગરીતે મળતા હોય તેવું મારા જોવામાં નથી આવ્યું.
– શ્રી રસિકલાલ છોટાલાલ પરીખ
પર્યુષણ વ્યાખ્યાન પ્રસ્થાનમાંથી