________________
૧૬
વંદામિ...
હું વંદન કરૂં છું...
વંદન – નમન ક્રિયા ભક્ત કરે છે... આરાધક કરે છે... સાધક કરે છે... વંદના – પૂજના – નમના પૂજ્યને હોય ... આરાધ્યને હોય... સાધ્યને હોય...
વીતરાગને ....
વંદન ગુણ પ્રાપ્તિ માટે છે ... ... ગુણીના બહુમાન માટે છે. ગુણીના આદર માટે છે. સન્માન માટે છે. આપણે જેને વંદન કરીએ તેના જેવા ગુણ સહજ રીતે આપણા આત્મામાં પ્રગટ થાય... હું વંદન કરૂં છું... અનંત ગુણીને સર્વજ્ઞને પ્રભુને વંદન... પ્રભુ પ્રતિમાને વંદન. પ્રભુના જીવને વંદન... પ્રભુના નામને વંદન ! સમવસરણમાં બિરાજી ધર્મદેશના આપતા તીર્થંકર પ્રભુને વંદન ! વંદન વીતરાગની આજ્ઞાને ! વંદન વીતરાગના શાસન ને ! વંદન વીતરાગની આજ્ઞાપાલન કરતા સમસ્ત મહાત્માને!
વંદામિ શબ્દ બોલતાં હૃદય આનંદ વિભોર થઇ જાય છે. વંદન કેટલી સુંદર અને કેટલી અદ્ભુત ક્રિયા છે. વંદન દ્વારા ગુણી આત્મા સાથે પ્રત્યક્ષ પરિચય થાય છે. ગુણી આત્માનું સાંનિધ્ય પ્રાપ્ત થાય છે. શાસ્ત્ર એ વંદન વિધિના અનેક ભેદ-પ્રભેદ બતાવ્યા છે. વંદન કરવા યોગ્ય કોણ ? વંદનીય કોણ ? વંદન ના ફળ શું?
શ્રી ઉત્તરાધ્યયન સૂત્રમાં સમ્યક્ત્વ પરાક્રમ અધ્યયનમાં ગુરુ ગૌતમસ્વામી પ્રભુને પૂછે ભંતે ? વંદન નું ફળ શું !
