________________
દેવદ્રવ્ય અને જિનપૂજા
અત્યાર સુધી તો સ્વદ્રવ્યથી પૂજા નહોતા કરતા, છતાં ઘરખર્ચ વગેરેમાં થોડો કાપ મૂકીને પણ દ્રવ્ય બચાવી સ્વદ્રવ્યથી પૂજા કરવાની ભાવનામાં હતા....પણ હવે એ કાપ મૂકવાની જરૂર નથી, દેવદ્રવ્યથી પૂજા કરવામાં કશો વાંધો નથી.
૨૮
કેસરાદિ સામગ્રી વગેરે માટે સંઘમાં ટીપ કરતા હતા....થોડું ફરીને શ્રાવકોને આગ્રહ કરીને પણ ખર્ચા પૂરા કરતા હતા. હવે આ બધુ કરવાની જરૂર નહીં-દેવદ્રવ્યથી જ આ બધું કરી લઈશું.
આવો બધો વિચાર કરી પ્રભુભક્તિમાં-સ્વદ્રવ્ય લગાડવાનું બંધ કરી દેવું એ બિલકુલ અનુચિત, આત્મઘાતક, અને આ પુસ્તિકાના અભિપ્રાયથી વિપરીત જાણવું.....
પરદ્રવ્યથી (કે દેવદ્રવ્યથી) પૂજા કરનારને પોતાના મનવચન-કાયા પ્રભુભક્તિમાં જોડવાનો લાભ મળે છે જ્યારે સ્વદ્રવ્યથી પૂજા કરનારને આ ત્રણ ઉપરાંત પોતાનું ધન પણ પ્રભુભક્તિમાં લગાડવાનો વધારાનો અપરંપાર લાભ મળે છે. તથા, પરમાત્માના અનુપમ ઉપકારની સામે સર્વસ્વ સમર્પણ કરી દઇએ તો પણ ઓછું છે, તો વધુમાં વધુ ધન વગેરે સમર્પિત થાય એ તો જોઇએ જ. અને એ પણ પોતાના જ આત્મહિત માટે છે... એટલે જેટલું વધુ પ્રભુચરણે સમર્પિત કર્યું એટલું વધારે લાભમાં...
પ્રભુભક્તિમાં નહીં વપરાયેલું દ્રવ્ય સંસારના ભોગવિલાસમાં જઈ વધુ પાપ કરાવીને દુર્ગતિના રવાડે ચડાવી દે એ પૂર્ણતયા શક્ય છે.
આવી અનેક વાસ્તવિકતાઓને નજરમાં લઈ પ્રભુભક્તિમાં વધુ ને વધુ સ્વદ્રવ્ય જોડવાનો હિતકર નિર્ણય દરેક શ્રાવકે કરવો જ જોઈએ.