________________
યાદ રહે માનવજીવન છે, મુનિજીવન છે, વળી છધ્યસ્થજીવન છે. માટે ચન્દ્રશેખર મહારાજના જીવન બાગમાં, ગુલાબ છે તો કાંટા પણ હોવાનાને ? ગુલાબને લીધે કાંટાની હાજરી ઢંકાઈ જાય છતાં કાંટાની હાજરી હોય તો ખરી જ. એટલે પ્રસ્તુત ગ્રંથમાં ક્યાંક જીવનની વાસ્તવિકતા રજૂ કરાઈ છે તે બાબતના ઉલ્લેખ વિના મને જીવન લેખનમાં અન્યાય થતો જણાતો હતો. માટે મેં ઉલ્લેખ કર્યો છે. ચિત્રનું સૌન્દર્ય બધા જ કલરના સમાવેશથી થાય, કાળો કલર પણ ચિત્રનું જ સૌન્દર્ય છે તે ન ભૂલશો.
આ લખાણને પૂર્ણ કરવા શીલજ પાસે કલ્હાર બંગલોઝ નામની સોસાયટીમાં, આવવાનું નક્કી કર્યું. ખુબ રળીયામણું સ્થાન છે. શ્રીયુત મુકુલભાઈ તેલીના બંગલાની બાજુમાં ખાલી બંગલો હતો. તેમાં રહેવાનું ગોઠવાયું. સંજયભાઈના ઘરમાં ૫૦૦ વર્ષ પ્રાચીન ગૃહ ચૈત્ય છે. પરમાત્મા અજિતનાથની પુણ્ય નિશ્રામાં આ પરિવાર ખુબ જ ભાવના આસ્થા સંપન્ન છે.
શ્રીમતિ ઈશાની બહેને અમને દીદી બનીને સાચવ્યા છે. જીવદયા ટ્રસ્ટ સાથે જોડાયા છે. નાનાપંખી, રખડતા કૂતરા વગેરે ૪૦૦-૫૦૦ જીવોની દિલ દઈને સેવા કરે છે. ઈશાની બહેનનું સમગ્ર અસ્તિત્વ દયા મય છે. કલ્હારમાં લઈ આવવાનું કામ ઋષભ (આલુ) ફોજદારે કર્યુ. આ છોકરો પણ ઈન્દ્રજિત વિજયનો પરમ ભક્ત છે. આવા બધા સજ્જનોની મદદથી લેખન કાર્ય આસાન બન્યું. માટે તેમનો સહુનો ઋણી છું.
અનેક પરિબળોના જોરે આ કાર્ય સંપન્ન થયું છે. જિનાજ્ઞા વિરુદ્ધ કે પૂ. ગુરુદેવના વિરાટ જીવન વૃક્ષના કોક પાંદડાને કે થડને હું ન સમાવી શક્યો હોઉં તો તેનું મિચ્છામી દુક્કડમ્.
લિ. પં. ચન્દ્રજિતવિજયજી કલ્હાર બંગલોઝ, શીલજ વિ.સં. ૨૦૭૦ વૈશાખ સુદ-૧૨