________________
ચરિત્ર કથાની સર્જન કથા..
सुचीनां श्रीमतां गेहे योग भ्रष्टो डभिजायते...
ગત જન્મની અધુરી સાધનાને પૂર્ણ કરવા યોગીઓ માનવ અવતારને પસંદ કરે છે.
ઈન્દ્રવદન તરીકે જન્મ, જીવનનો આરંભ તે સાધનાની અપૂર્ણતાનું પ્રતીક હતું. મુનિ ચન્દ્રશેખરવિજયજી તરીકેની યાત્રા તે અધુરી સાધનાપથના પ્રારંભની યાત્રા છે અને પંન્યાસ ચન્દ્રશેખરવિજયજી તરીકે જીવનને કરેલી અલવિદા તે સાધનાની ફલશ્રુતિ છે. ગુરુદેવ માટે કાર્ય મુક્તિ તે મોક્ષ ન હતો. ગુરુદેવ માટે નિષ્કામ કાર્ય કૃતિ (કાર્ય કરતા રહેવું) તે જ મોક્ષાનંદ હતો. અમે ગુરુદેવને રાત્રે હતાશ જોયા છે, પણ સવારે પુનઃ પાવર હાઉસ તરીકે ધમધમતા જોયા છે. ન્યૂ કૉર્પોરેટ વર્લ્ડમાં સ્ટીવ જોબ્સ-જે એપલ કંપનીના CEO હતા તેને માટે ચૅલેન્જ તે સ્ટ્રગલ ન હતી. તે ચેલેન્જ શોધતા હતા. કંઈક તેવી જ ઝનૂની શક્તિ સાથે સામાજિક અને ધાર્મિક જગતમાં ચન્દ્રશેખર મહારાજનું આગમન થયું. સ્ટીવ, એક કંપનીને દોડતી કરવા આવેલા, પણ ચન્દ્રશેખર મહારાજ તો વ્યક્તિને કંપની બનાવવા આવ્યા હતા. એક એક વ્યક્તિ ઉત્પાદન ક્ષમ બને તે જ તેમનું મિશન હતું.
આ ગુરુદેવનો દેહ સને. ૨૦૧૧માં છુટી ગયો. ૭૭ વર્ષના જીવનને અક્ષર રૂપે સ્થાપિત કરવાનું કામ આસાન ન હતું. આ તો પડકાર હતો. સન. ૨૦૧૩નું મારૂ ચાતુર્માસ નારણપુરામાં હતું. અનન્ય વફાદાર ગુરુભક્ત લલિતભાઈ મારી પાસે આવ્યા અને મને કહે છે કે “ગુરુદેવશ્રીનું જીવન ચરિત્ર પ્રગટ કરવાનું છે, આપ લખશો” ?
ગુરુદેવનું શિષ્યવૃંદ કલ્પવૃક્ષ જેવું છે. જેવા માંગો તેવા મહાત્મા મળી રહે. આ શિષ્યવૃંદમાં જ્ઞાની, વક્તા, તપસ્વી, લેખક, વૈયાવચ્ચી, સંયમી, સંગ્રાહક, આદિ અનેક છે. તેમાં મને યાદ કર્યો તે મારા માટે ભેટ હતી કે પડકાર, તે હું નક્કી ન કરી શક્યો. બે ચાર દિવસ વિચારવાનો સમય લીધો. છેવટે આ કાર્યમાં નિમિત્ત બનવાનું મેં પસંદ કર્યું.