________________ - // 3 अथ भत्तपरिन्नापयण्णो // नमिऊण महाइसयं महाणुभावं मुणिं महावीरं / . भणिमो भत्तपरिणं निअसरणट्ठा परट्ठाय // 1 // भवगहणभमणरीणा लहंति निव्वुइसुहं जमल्लीणा / तं कप्पदुमकाणण सुहयं जिणसासणं जयइ // 2 // मणुअत्तं जिणवयणं च दुल्लहं पाविऊण सप्पुरिसा ! / सासयसुहिकरसिएहिं नाणवसिएहिं होअव्वं // 3 // जं अन्ज सुहं भविणो संभरणीअं तयं भवे कल्लं / मग्गंति निरुवसग्गं अपवग्गसुहं बुहा तेणं // 4 // नरविबुहेसरसुक्खं दुक्ख परमत्थओ तयं बिंति / परिणामदारुणमसासयं च जं ता अलं तेण // 5 // जं सासयसुहसाहणमाणाआराहणं जिणिंदाणं / ता तीए जइअव्वं जिणक्यणविसुद्धबुद्धीहिं // 6 // तं नाणदंसणाणं चारित्ततवाण जिणपणीआणं / जं आराहणमिणमो आणाआराहणं बिंति // 7 // पव्वजाए अब्भुजओवि आराहओ अहासुत्तं / अब्भुजअमरणेणं अविगलमाराहणं लहइ // 8 // तं अब्भुज्जुअमरणं अमरणधम्मेहिं वन्नि तिविहं / भत्तपरिन्ना इंगिणि पाओवगमं च धीरेहिं // 9 //