________________ निशम्येदं वचो ध्यातं, राज्ञा दीक्षां जिघृक्षुणा / सुतः को मम योग्योऽस्ति, राज्ये कं स्थापयाम्यहम् // 1447 // अथागृहीतसंकेते ! तेनाहं रिपुदारणः / विस्फारितदृशा दृष्टो, निषण्णस्तत्र निर्धनः // 1448 // इतश्च कृशदेहोऽपि, मनाक् पुण्योदयोऽस्फुरत् / मन्मित्रं तेन तातस्य, मयि प्रत्यागतं मनः // 1449 // दध्यौ बहिष्कृतो योऽभूत्, स एष रिपुदारणः / / जगाम शोच्यतां हीदं, न युक्तं सुतभर्त्सनम् // 1450 // एनं राज्येऽभिषिच्याथ, दीक्षां गृह्णामि निर्मलाम् / ततश्चाहूय तातेन, स्वोत्सङ्गेऽहं निवेशितः // 1451 // पृष्टश्च सूरिस्तातेन, भदन्त ! भवंतामयम् / विदितः कुलजेऽप्यस्मिन्, कुतोऽनर्थोच्चयोऽजनि // 1452 // सूरिणोक्तं महाराज, न दोषोऽस्य तपस्विनः / शैलराजमृषावादावस्यानर्थस्य कारणम् . // 1453 // तातेनोक्तं कदैताभ्यां, वियोगोऽस्य भविष्यति / सूरिराह गते भूरिकाले भूपाद्धिताशयात् // 1454 // मृदुतासत्यते नाम, शुभे संप्राप्य कन्यके / शैलराजमृषावादौ, त्यक्ष्यत्ययमसंशयम् (युग्मम्) // 1455 // चिन्तयिष्यति तेनान्यः, कश्चिदस्य प्रयोजनम् / साम्प्रतं मोहमुत्सृज्य, स्वाभीष्टं भूप ! साध्यताम् // 1456 // ततो गुरुगिरा ज्ञात्वा, मामशक्यप्रतिक्रियम् / स्वकार्यसाधनोद्युक्तः, प्राज्ये राज्येऽभिषिच्य माम् // 1457 / / विचक्षणगुरोः पार्श्वे, निष्क्रान्तो नरवाहनः / .. बहिर्देशेषु तेनामा, व्यहार्षीदद्रिगोऽपि सः || 1458 //
