________________ सकर्मकस्य जीवस्य, संसारीत्यभिधाभृतः / स्वीकृताऽऽभ्यां. स्ववीर्येण, चित्तवृत्तिमहाटवी // 744 // प्रकर्षः प्राह तद्राज्यग्रहे कालः कियानभूत् / विमर्शः प्राह नैवादि, जाने नान्येऽपि जानते // 745 // परमार्थस्त्वयं वत्स, कथ्यते तव साम्प्रतम् / स कर्मपरिणामाख्यो, गरिष्ठो विष्टराधिपः // 746 // अयं पुनर्महामोहस्तस्यादेशविधायकः / तनियुक्तभटासेव्यस्तत्कोशस्य च वृद्धिकृत् // 747 // ईदृशानल्पसज्ज़ल्पकल्पनेनाल्पितश्रमौ / तावतीत्य गतौ मार्ग, भवचक्राभिधं पुरम् // 748 // इतश्च शिशिरोऽतीतो, वनकौमारसन्निभः / तत्तारुण्यदशातुल्यो, जजृम्भे मधुरुद्धतः // 749 // लताकरैर्नृत्यमिव प्रकुर्वन्, कृतान्तकाष्ठागतवातधूतैः / दृष्टः स ताभ्यामथ काननेषु, मत्तालिरावैरिव चारु गायन्॥ 750 // हसन्निवोद्यत्कुसुमाट्टहासै, पठन् शुकानामिव जल्पितेन / रज्यन्निवाशोकलताविलासै-नमन्निवालोलतरूत्तमाङ्गैः // 751 // वपुर्भूतां शापमिव प्रयच्छन्, प्रवृद्धताम्राक्षकुहूरवेण / विलोलचूतद्रुममञ्जरीभि-राकारयन् विश्वमिवाङ्गुलीभिः // 752 // रुदन्निव प्रच्युतसिन्दुवार-पुष्पालिदम्भाद् गलिताश्रुधारम् / क्रन्दन्निव च्छन्ननिकुञ्जगुञ्ज-त्कपोतहुङ्कारपरंपराभिः // 753 // रजोऽभिवर्षन्निव विप्रकीर्णा-मौदैः प्रियालद्रुममञ्जरीणाम् / प्रदर्शयन् वह्निमिव ज्वलन्तं, समुल्लसत्किंशुककैतवेन // 754 // धावन्निवोन्मत्तमृगव्रजाणा-मुत्प्लुत्य यातैर्ललनान्वितानाम् / दिवाऽभिवल्गन्निव माधवीनां, परागहस्तैर्विततैरुदस्तैः // 755 // 183
