________________ दसवेतालियधारी पुन्जिहि जणेण जह व दसपुवी। सो पुण सुटुतरागं पुज्जिही समणसंघेणं // 834 // अउणावीससहस्सो(?स्सा) संमणा होहिंति सक्कया लोए / दुस्सहदूसमकाले ख़ीणे अप्पावसेसजगे // 835 // धम्मो य जिणाणुमतो राया य जणस्स लोयमज्जाया। ण(तो) ते हवंति खीणा जं सेसं तं निसामेह / / 836 // सावगमिहुणं समणो समणी राया तहा अमच्चो य। एते हवंति सेसं अण्णो [य] जणो बहुतरातो // 837 // ओसप्पिणीइमीसे चत्तारि अपच्छिमाई संघस्स / अंतम्मि दूसमाए दससु वि वासेसु एवं तु . // 838 // दुप्पसहो अणगारो नामेण अपच्छिमो पवयणस्स। फग्गुसिरी समणीणं सा वि य समणीणऽपच्छिमिया // 839 // विग्गहवती विव दया, कमलविहूणा सिरि व्व पच्चक्खा / होहिति तइया समणी फग्गुसिरी नाम नामेणं . // 840 // तम्मि य नगरे सेट्ठी होही नामेण नाइलो नाम। सो सव्वसावगाणं होही तइया अपच्छिमओ // 841 // सेट्ठी य नाइलो नाम गहवती सावगाण पच्छिमतो। सच्चसिरि साविगाणं सा वि य तइया अपच्छिमिया // 842 // अभिगतजीवाऽजीवा सा या किर साविया अपच्छिमिया / धम्मम्मि निच्छितमती सच्चसिरी नाम नामेणं // 843 // राया य विमलवाहणो स(?सु)मुहो नामेण तस्स य अमच्चो / इय दूसमाए काले रायाऽमच्चो अपच्छिमगो // 844 // दुप्पसहो फग्गुसिरी सच्चसिरी नाइलो य राया य / इय दूसमचरिमंते वीसतिवासाउया एते // 845 // 127
