________________ भीउव्विग्गससंभम हाहा किमिअंति गग्गिरुल्लावा / रिसिगहसणिच्छराई गंतुमणंतं पयंपंति // 347 // भो भो सव्वगओ विअ पभू अ ससुरासुरस्स लोअस्स / तह वि तुमं णीओ इव सयणस्सुवरि णिराविक्खो // 348 // गरुडो अ सहयरो ते पडिसाहर वणदवोवमं को / मा मूढो मिच्छो इव पहरसु नियएसु गत्तेसु / 349 // रिसिगहवयणं सोउं इमं तु चक्काउहो वि चितेइ / कोहाइएण पिच्छसु मए सहाओ हओ हुँतो // 350 // णाणी सत्थत्थविआणओ वि कोहग्गिजालसंतत्तो / गम्मागम्म हिआहिअ कज्जाकज्जं ण लक्खेइ // 351 // गरुडस्स अणंतस्स य जाया संधीज्झओ कओ गरुडो / अमयं दाउं विणया मोअइ दासत्तणाउ त्ति // 352 // जइ गय-कच्छभ-वडदुम गरुडेणुप्पाडिआ य णीआ य / तो उक्खिवसि सस ! तयं तुमं पि दइयं सुबद्धं पि // 353 // सत्ताहवद्दलम्मी धरिओ गोवद्धणो महुमहेणं / ता कह ण धरेसि तुमं गयदीयं तिल्लपरिपुण्णं // 354 // सेऊबंधे विय वाणरेहिं णेगाई जोअणाइं गिरी / उक्खिणिउं उवि(व्वि ?)द्धा पक्खित्ता उदहिमज्झम्मि // 355 // तो जइ पुत्तेण तुहं रुक्खो उम्मूलिओ महाविडवो / दीअंमपावितेणं तो भणसु तर्हि किमच्छेरं // 356 // वणवाडिअ भंगे वि अ हणुअंतो महिरुहे महाविडवे / उक्खणइ अयत्तेणं जत्थ इमो खंधओ भणिओ // 357 // खज्जूरी मारुइणो अ कम्महया पलासवग्गंते / सीसेण उत्तरंती अ कं महया पलासवग्गं ते // 358 // 295
