________________ ओहिन्नाणस्स तहा अणिदिएसुं पि जो खओवसमो / मतिसुयनाणाणं पुण लक्खणभेदादिणा भेओ // 840 // एवं च सव्वविसंयं जति वि य चरममिह तह वि सिद्धो तु / णेयविसेसो तेसिं धम्मंतरजुत्तसिद्धीओ // 841 // ण य पडिवत्तिविसेसा एगम्मि अणेगभेदभावो वि / जं ते तहाविसिटे ण जातिभेदे विलंति // 842 // णावरणभेदो वि हु सहावभेदे वि दोसहेउ त्ति / खीणावरणस्स जतो सव्वेसि ण संगतो भावो // 843 // छउमत्थसामिगत्ता तब्भावावगमतो य तस्स त्ति / तद्धम्मत्ते वि तओ जुत्तिविरोधा त्ति वइमेत्तं // 844 // जमिह छउमत्थधम्मा जम्मादीया ण होति सिद्धाणं / इय केवलीणमाभिणिबोहाऽभावम्मि को दोसो ? // 845 // अन्ने भणंति आभिणिबोधादीणि वि जिणस्स विजंति / अफलाणि य सूरुदए जहेंव णक्खत्तमादीणि // 846 // सहकारिहेतुविरहा तस्साभावाउ चेव नायव्वो / केवलभावातो इय सव्वनुत्तम्मि अविरोहो // 847 // चरमावरणस्स खए पतिसमयम्मि वि ण तस्स भावो त्ति / / तस्साहव्वाउ च्चिय तब्बंधातो य पतिसमयं // 848 // ता.चरमए च्चिय खओ झाणविसेसातो तीरए काउं / चिरसंचियं पि हु तणं खणेण दावानलो दहति // 849 // एवं अवग्गहातो आरब्भ इहेगमेव नाणं ति / मिच्छत्तमेव अहवा णो खलु सामनऽवेक्खाए // 850 // कमकरणे पुण भणियं पओयणं दिट्ठसमयसारेहिं / / आभिणिबोहादीणं वोच्छामि तयं समासेणं // 851 //
