Shobhan Stuti Vruttimala Part 01

SR No.: 004429
Original Sutra Author: N/A
Author: Rihtvardhanvijay
Publisher: Kusum Amrut Trust
Publication Year: 2010
Total Pages: 234
Language: Hindi
Classification: Book_Devnagari
File Size: 5 MB

Page 26

પ્રસ્તાવના એક-એક ઉત્તરો તેને સાચા લાગ્યાં. ગુરુગમ સાચો લાગ્યો એટલે જિનપ્રવચન પણ તેને સાચું લાગ્યું. જે જિનપ્રવચન તરફ તે નફરત ભરી નજરે જોતો હતો એ જ જિનાગમો તરફ હવે તેને અતૂટ આદર જાગ્યો. અંતે શોભનમુનિથી પ્રતિબોધ પામેલાં ધનપાલ પંડિતે મિથ્યાત્વ ફગાવ્યું. સમ્યક્ત્વ અપનાવ્યું. સમ્યક્ત્વમૂલક 12 વ્રતો સ્વીકાર્યા. સમકિતની કરણીઓને અને વ્રતના આચારોને ઉંડાણપૂર્વક સમજીને એ મુજબનું જીવન જીવવાની શરૂઆત કરી. શોભનમુનિ પાસે નિયમિત જ્ઞાનોપાસના કરતાં જઇને અંતે તે પરમહંત બન્યો. જિનમતના અનેક રહસ્યોનો વેત્તા બન્યો. > પ્રતિબંધની વાપસી અને શોભનમુનિની રાજસભામાં દેશના: પોતે કરાવેલી જૈનમુનિઓની પ્રવેશબંધી એને ખૂબ ખૂંચવા લાગી. એને દૂર હટાવવાનું નક્કી કર્યું. એક વાર રાજાને પ્રસન્ન કરીને પ્રસ્તાવ મૂક્યો: રાજનું, તમે સનાતનપંથી છો છતાં દરેક ધર્મના ધર્મગુરુઓનો તમારા રાજયમાં આદર થાય છે અને તેથી દરેક ધર્મગુરુઓ તમારી દેશ-દેશાંતરમાં પ્રશંસા કરે છે. શા માટે જૈન શ્વેતાંબર મુનિઓ તરફથી તમે અપકીર્તિ પામો છો? એમનો પણ સત્કારપૂર્વક પ્રવેશ કરાવીને શું તમારે તમારી આ અપકીર્તિ દૂર ન કરી દેવી જોઈએ ? ધનપાલની રજૂઆત પ્રશંસાભૂખ્યાં રાજાના ગળે શીરાની જેમ ઉતરી ગઈ. રાજાભોજે એ પછી જૈન શ્વેતાંબર શ્રમણો પરનો રાજય પ્રવેશ માટેનો પ્રતિબંધ દૂર કરાવ્યો. આ સમાચાર માલવાના જૈનસંઘને મળ્યાં ત્યારે તે સંઘ નાચી ઉઠ્યો. ધીમે ધીમે તે સર્વત્ર પ્રસર્યા. સર્વત્ર આનંદની લહેર ફરી વળી. ધનપાલના મુખેથી શોભનમુનિના જ્ઞાનની પ્રશંસા સાંભળીને રાજાએ તેમને રાજસભામાં પધારવાનું નિમંત્રણ આપ્યું. રાજસભામાં શોભનમુનિનો સત્કાર થયો. એમની દેશના રાજાભોજે સાંભળી અને રાજવી સહિત કૂડીબંધ બ્રાહ્મણ વિદ્વાનો એથી પ્રભાવિત થયાં. બીજી તરફ આચાર્ય શ્રી મહેન્દ્રસૂરિ મહારાજ પણ માલવાના જૈનોની વિનંતીથી માલવા તરફ પધાર્યા. ગામેગામ તેમનું સ્વાગત થયું. ધારાનગરીમાં પણ તેમની સ્વાગત સહિત પધરામણી થઈ. શોભનમુનિએ ત્યારે કૃતકૃત્યતાની લાગણી અનુભવી. પોતાના નિમિત્તે સર્જાયેલી જૈનસંઘ પરની આફત પોતાના હાથે જ દૂર ટળી એનો એમને ભારે હર્ષ હતો.