________________ जंबुद्दीवपण्णत्ती व.३ तेणेव उवागच्छइ 2 त्ता भोयणमंडवंसि सुहासणवरगए अट्ठमभत्तं पारेइ 2 त्ता भोयणमंडवाओ पडिणिक्खमइ 2 त्ता जेणेव बाहिरिया उवट्ठाणसाला जेणेव सीहासणे तेणेव उवागच्छइ 2 त्ता सीहासणवरगए पुरत्थाभिमुहे णिसीयइ 2 त्ता अट्ठा. रस सेणिप्पसेणीओ सद्दावेइ 2 त्ता एवं वयासी-खिप्पामेव भो देवाणुप्पिया! उस्सुक्कं उक्करं जाव मागहतित्थकुमारस्स देवस्स अट्ठाहियं महामहिमं करेह 2 त्ता मम एयमाणत्तियं पच्चप्पिणह, तए णं ताओ अट्ठारस सेणिप्पसेणीओ भरहेणं रण्णा एवं वुत्ताओ समाणीओ हट्ट जाव करेंति 2 त्ता एयमाणत्तियं पञ्चप्पिणंति, तए णं से दिव्वे चक्करयणे वइरामयतुंबे लोहियक्खामयारए जंबूणयणेमीए णाणामणिखुरप्पथालपरिगए मणिमुत्ताजालभूसिए सणंदिघोसे सखिंखिणीए दिव्वे तरुणरविमंडल-णिमे णाणामणिरयणघंटियाजालपरिक्खित्ते सव्वोउयसुरभिकुसुमआसत्तमलदामे अंतलिक्ख पडिवण्णे जक्खसहस्ससंपरिबुडे दिव्वतुडियसद्दसण्णिणाएणं पूरेते चेव अंबरतलं णामेण य सुदंसणे णरखइस्स पढमे चक्करयणे मागहतित्थकुमारस्स देवरस अट्ठाहियाए महामहिमाए णिव्वत्ताए समाणीए आउहघरसालाओ पडिणिक्खमइ 2 त्ता दाहिणपञ्चत्थिमं दिसिं वरदामतित्थाभिमुहे पयाए यावि होत्था // 45 // तए णं से भरहे राया तं दिव्यं चक्करयणं दाहिणपच्चत्थिमं दिसिं वरदामतित्थाभिमुहं पयायं चावि पासइ 2 त्ता हट्टतुट्ठ० कोडुंबियपुरिसे सद्दावेइ 2 त्ता एवं वयासी-खिप्पामेव भो देवाणुप्पिया ! हयगयरहपवर० चाउरंगिणिं सेण्णं सण्णाहेह आभिसेक्कं हत्थिरयणं पडिकप्पेहत्तिकट्ट मजणघरं अणुपविसइ 2 त्ता तेणेव कमेणं जाव धवलमहामेहणिग्गए जाव सेयवरचामराहिं उधुव्वमाणीहिं 2 माइयवरफ्लयपवरपरिगरखेडयवरवम्मकवयमाढीसहस्सकलिए उक्कडवरमउडतिरीडपडागझयवेजयंतिचामरचलंतछत्तंधयारकलिए असिखेवणिखग्गचावणारायकणयकप्पणिसूललउडभिंडिमालधगुहतोणसरपहरणेहि य कालणीलरुहिरपीयसुक्किलअणेगचिंधसयसण्णिविढे अप्फो. डियसीहणायछेलियहयहेसियहत्थिगुलुगुलाइय-अणेगरहसयसहस्स-घणघणेतणी-हम्ममाणसद्दसहिएण जमगसमगभंभाहोरंभकिर्णितखरमुहिमुगुंदसंखियपरिलिवच्चगपरिवाइणिवंसवेणुविपंचिमहइकच्चभिरिगिसिगियकलतालकंसतालकरधाणुत्थिएण महया सद्दसणिणाएण सयलमवि जीवलोगं पूरयंते बलवाहणसमुदएणं एवं जक्खसहस्सपरिवुडे वेसमणे चेव धणवई अमरवइसण्णिभाएइडीए पहियकित्ती गामागरणगरखेडकब्बड तहेव सेसं जाव विजयखंधावारणिवेसं करेइ 2 त्ता वड्डइरयणं सद्दावेइ 2 त्ता एवं वयासी-खिप्पामेव भो देवाणुप्पिया ! मम आवसहं पोसहसालं च करेहि,
