________________ पण्णवणासुत्तं प० 2 357 कहि णं भंते ! आणय-पाणयाणं देवाणं पजत्तापजत्ताणं ठाणा पण्णत्ता ? कहि णं भंते ! आणय-पाणया देवा परिवसंति ?, गोयमा! सहस्सारस्स कप्पस्स उप्पि सपक्खि सपडिदिसिं जाव उप्पइत्ता एत्थ णं आणयपाणयणामा दुवे कप्पा पण्णत्ता / पाईणपडीणायया उदीणदाहिणवित्थिण्णा, अद्धचंदसंठाणसंठिया, अच्चिमालीभासरासिप्पभा, सेसं जहा सणंकुमारे जाव पडिरूवा / तत्थ ण आणयपाणयदेवाणं चत्तारि विमाणावाससया भवंतीति मक्खायं जाव पडिरूवा / वडिंसगा जहा सोहम्मे कप्पे / णवरं मझे इत्थ पाणयवडिंसए / ते णं वडिंसगा सव्वरयणामया अच्छा जाव पडिरूवा / एत्थ णं आणयपाणयदेवाणं पजत्तापजत्ताणं ठाणा पण्णत्ता / तिसु वि लोगस्स असंखेजइभागे / तत्थ णं बहवे आणयपाणयदेवा परिवसंति महिड्ढिया जाव पभासेमाणा / ते णं तत्थ साणं साणं विमाणावाससयाणं जाव विहरति / पाणए इत्थ देविंदे देवराया परिवसइ जहा सणंकुमारे / णवरं चउण्हं विमाणावाससयाणं, वीसाए सामाणियसाहस्सीणं, असीईए आयरक्खदेवसाहस्सीणं, अण्णेसिं च बहूणं जाव विहरइ // 130 // कहिणं भंते ! आरणच्चुयाणं देवाणं पजत्तापजत्ताणं ठाणा पण्णत्ता ? कहि णं भंते ! आरणच्चुया देवा परिवसंति ? गोयमा ! आणयपाणयाणं कप्पाणं उप्पि सपक्खि सपडिदिसिं एत्थ णं आरणच्चुया णामं दुवे कप्पा पण्णत्ता। पाईणपडीणायया, उदीणदाहिणवित्थिण्णा, अद्धचंदसंठाणसंठिया, अच्चिमालीभासरासिवण्णाभा, असंखेजाओ जोयणकोडाकोडीओ आयामविक्खंभेणं, असंखेन्जाओ जोयणकोडाकोडीओ परिक्खेवेणं, सव्वरयणामया, अच्छा, सण्हा, लण्हा, घट्ठा, मट्ठा, णीरया, णिम्मला, णिप्पंका, णिकंकडच्छाया, सप्पभा, सस्सिरीया, सउजोया, पासाईया, दरिसणिज्जा, अभिरुवा, पडिरूवा / एत्थ णं आरणच्चुयाणं देवाणं तिण्णि विमाणावाससया भवंतीति मक्खायं / ते णं विमाणा सव्वरयणामया, अच्छा, सण्हा, लण्हा, घट्टा, मट्टा, णीरया, णिम्मला, णिप्पंका, णिकंकडच्छाया, सप्पभा, सस्सिरीया, सउज्जोया, पासाईया, दरिसणिजा अभिरुवा, पडिरूवा / तेसि णं विमाणाणं कप्पाणं बहुमज्झदेसभाए पंच वडिंसया पण्णत्ता। तंजहा—अंकवडिंसए, फलिहवडिंसए, रयणवडिंसए, जायरूववडिंसए मज्झे एत्थ अच्चुयवसिए / ते णं वडिंसया सव्वरयणामया जाव पडिरूवा / एत्थ णं आरणच्चुयाणं देवाणं पजत्तापजत्ताणं ठाणा पण्णत्ता / तिसु वि लोगस्स असंखेजहभागे / तत्थ गं बहवे आरणच्चुया देवा परिवसति / अच्चुए इत्थ देविंदे देवराया परिवसइ, जहा पाणए जाव
