________________ 356 अनंगपविट्ठसुत्ताणि विमाणावाससयसहस्सा, वडिंसया जहा सोहम्मवडिंसया, णवरं मज्झे इत्थ बंभलोयवडिंसए / एत्थ णं बंभलोगदेवाणं पजत्तापजत्ताणं ठाणा पण्णत्ता सेसं तहेव जाव विहरंति / बंभे इत्थ देविंद देवराया परिवसइ, अरयंबरवत्थधरे, एवं जहा सणंकुमारे जाव विहरइ / णवरं चउण्हं विमाणावाससयसहस्साणं, सट्ठीए सामाणियसाहस्सीणं, चउण्हं सट्ठीए आयरक्खदेवसाहस्सीणं, अण्णेसिं च बहूणं जाव विहरइ // 126 // कहि णं भंते ! लंतगदेवाणं पजत्तापजत्ताणं ठाणा पण्णत्ता ? कहि णं भंते ! लंतगदेवा परिवसंति ?, गोयमा! बंभलोगस्स कप्पस्स उप्पिं सपक्खि सपडिदिसिं बहूई जोयणाई जाव बहुगाओ जोयणकोडाकोडीओ उड्ढे दूरं उप्पइत्ता एत्थ णं लंतए णामं कप्पे पण्णत्ते पाईणपडीणायएं, जहा बंभलोए / णवरं पण्णासं विमाणावाससहस्सा भवंतीति मक्खायं / वडिंसगा जहा ईसाणवडिंसगा, णवरं मज्झे इत्थ लंतगवडिंसए, देवा तहेव जाव विहरति / लंतए एत्थ देविंदे देवराया परिवसइ, जहा सणंकुमारे / णवरं पण्णासाए विमाणावाससहस्साणं, पण्णासाए सामाणियसाहस्सीणं, चउण्ह य पण्णासाणं आयरक्खदेवसाहस्सीणं, अण्णेसिं च बहूगं जाव विहरइ // 127 // कहि णं भंते !.महासुकाणं देवाणं पजत्तापजत्ताणं ठाणा पण्णत्ता ? कहि णं भंते ! महासुक्का देवा परिवसंति ?, गोयमा ! लंतगस्स कप्पस्स उप्पिं सपक्खि सपडि दिसिं जाव उप्पइत्ता एत्थ णं महासुक्के णामं कप्पे पण्णत्त पाईणपडीणायए, उदीणदाहिणवित्थिण्णे, जहा बंभलोए / णवरं चत्तालीसं विमाणावाससहस्सा भवंतीति मक्खायं / वडिंसगा जहा सोहम्मवडिसए जाव विहरंति / महासुक्के इत्थ देविंदे देवराया जहा सणंकुमारे / णवरं चत्तालीसाए विमाणावाससहस्साणं, चत्तालीसाए सामाणियसाहस्सीणं, चउण्ह य चत्तालीसाणं आयरक्खदेवसाहस्सीणं जाव विहरइ // 128 // कहि णं भंते ! सहस्सारदेवाणं पजत्तापजत्ताणं ठाणा पण्णत्ता ? कहि णं भंते ! सहस्सारदेवा परिवसंति ?, गोयमा ! महासुक्कस्स कप्पस्स उप्पिं सपक्खि सपडिदिसिं जाव उप्पइत्ता एत्थ णं सहस्सारे णामं कप्पे पण्णत्ते / पाइणपडीणायए जहा बंभलोए, णवरं छव्विमाणावाससहस्सा भवंतीति मक्खायं / देवा तहेव जाव वडिंसगा जहा ईसाणस्स वडिंसगा। णवरं मज्झे इत्थ सहस्सारवडिंसए जाव विहरति / सहस्सारे इत्थ देविंदे देवराया परिवसइ जहा सणंकुमारे / णवरं छण्हं विमाणावाससहस्साणं, तीसाए सामाणियसाहस्सीणं, चउण्ह य तीसाए आयरक्खदेवसाहस्सीणं जाव आहेवच्चं कारेमाणे विहरइ।।१२९॥
