________________ 246 अनंगपविट्ठसुत्ताणि सव्वग्गेणं पण्णत्ते // 172 // जइ णं भंते ! लवणसमुद्दे दो .जोयणसयसहस्साई चक्कवालविक्वंभेणं पण्णरस जोयणसयसहस्साई एक्कासीइं च सहस्साई सयं इगुयालं किंचि विसेसूणे परिक्खेवेणं एगं जोयणसहस्सं उव्वेहेणं सोलस जोयणसहस्साई उस्सेहेणं सत्तरस जोयणसहस्साइं सव्वग्गेणं पण्णत्ते / कम्हा णं भंते ! लवणसमुद्दे जंबुद्दीवं 2 णो उवीलेइ णो उप्पीलेई णो चेव णं एक्कोदगं करेइ ? गोयमा ! जंबुद्दीवे णं दीवे भरहेरवएसु वासेसु अरहंतचक्कवट्टिबलदेवा वासुदेवा चारणा विजाहरा समणा समणीओ सावया सावियाओ मणुया पगइभद्दया पगइविणीया पगइउवसंता पगइपयणुकोहमाणमायालोमा मिउमद्दवसंपण्णा अल्लीणा भद्दगा विणीया, तेसि णं पणिहाए लवणे समुद्दे जंबुद्दीवं दीवं णो उवीलेइ णो उप्पीलेइ णो चेवणं एगोदगं करेइ गंगासिंधुरत्तारत्तवईसु सलिलासु देवयाओ महिड्ढियाओ-जाव पलिओवमट्टिइयाओ परिवसंति, तासि णं पणिहाए लवणसमुद्दे जाव णो चेव णं एगोदगं करेइ, चुल्लहिमवंतसिहरेसु वासहरपव्वएसु देवा महिड्ढिया० तेसि णं पणिहाए० हेमवएरण्णवएसु वासेसु मणुया पगइभद्दगा०, रोहियंससुवण्णकूलरुप्पकूलासु सलिलासु देवयाओ महिड्ढियाओ० तासिं पणि० सद्दावइवियडावइ वट्टवेयड्ढपव्वएसु देवा महिड्डिया जाव पलिओवमट्टिइया परिव०, महाहिमवंतरप्पिसु वासहरपव्वएसु देवा महिड्ढिया जाव पलिओवमट्टिइया०,हरिवासरम्मयवासेसु मणुया पगइभद्दगा०, गंधावइमालवंतपरियाएसु वट्टवेयड्ढपव्वएसु देवा महिड्ढिया०, णिसढणीलवंतेसु वासहरपव्वएसु देवा महिड्ढिया०,सव्वाओ दहदेवयाओ भाणियव्वाओ,पउमद्दहतिगिच्छिकेसरिदहावसाणेसु देवयाओ महिड्ढियाओ०तासिं पणिहाए० पुव्वविदेहावरविदेहेसु वासेसु अरहंतचक्कवट्टिबलदेववासुदेवा चारणा विजाहरा समणा समणीओ सावया सावियाओ मणुया पगइ० तेसिं पणिहाए लवण० सीयासीओयगासु सलिलासु देवयाओ महिड्-ि ढया०, देवकुरुउत्तरकुरुसु मणुया पगइभद्दगा०, मंदरे पव्वए देवयाओ महिड्ढिया०, जंबूए य सुदंसणाए जंबूदीवाहिवई अणादिए णामं देवे महिड्ढिए जाव पलिओवमट्टिइए परिवसइ तस्स पणिहाए लवणसमुद्दे० णो उवीलेइ णो उप्पीलेइ णो चेव णं एक्कोदगं करेइ, अदुत्तरं च णं गोयमा ! लोगट्टिई लोगाणुभावे जण लवणसमुद्दे जंबुद्दीवं दीवं णो उवीलेइ णो उप्पीलेइ णो चेव णमेगोदगं करेइ // 173 / / // मंदरोइसो समत्तो॥
