________________ कुवलयमालाकहा 83 संबुज्झह किं ण बुज्झह। एवं च जहा काम-णिव्वे ओ तहा कोह-लोह-माण-मायादीणं कुतित्थाणं च। समकालं चिय सव्व-भाव-वियाणएण गुरुणा सव्वण्णुणा तहा तहा गायंतेण ताइं चोराणं पंच वि सयाइं संभरिय-पुव्व-जम्म-वुत्तंताई पडिवण्ण-समण-लिंगाइं तहा कयं जहा संजमं पडिवण्णाई ति। ता एत्तियं एत्थ सारं। अम्हेहि वि एरिसा चउब्विहा धम्म-कहा समाढत्ता। तेण किंचि काम-सत्थ-संबद्धं पि भणिहिइ। तं च मा णिरत्थयं ति गणेज्जा। किंतु धम्म-पडिवत्तिकारणं अक्खेवणि त्ति काऊण बहु-मयं ति। तओ कहा-सरीरं भण्णइ। तं च केरिसं। 10. सम्मत्त-लंभ-गरुयं अवरोप्पर-णिव्वडंत-सुहि-कज्जं। णिव्वाण-गमण-सारं रइयं दक्खिण्णइंधेण॥ जह सो जाओ जत्थ वजह हरिओ संगएण देवेण। जह सीह-देव-साहू दिवा रणम्मि सुण्णम्मि।। जह तेण पुव्व-जम्मं पंचण्ह जणाण साहियं सोउं। पडिवण्णा सम्मत्तं सग्गं च गया तवं काउं। भोत्तूण तत्थ भोए पुणो वि जह पाविया भरहवासे। अण्णोण्णमयाणंता केवलिणा बोहिया सव्वे॥ सामण्णं चरिऊणं संविग्गा ते तवं च काऊणं। कम्म-कलंक-विमुक्का जह मोक्खं पाविया सव्वे।। एयं सव्वं भणिमो एएण कमेण इह कहा-बंधे। सव्वं सुणेह सुयणा साहिज्जतं मए एण्हि॥ एयं तु कहा-करणुज्जयस्स जह देवयाएँ मह कहियं। तह वित्थरेण भणिमो तीऍ पसाएण णिसुणेह। तत्थ वि ण याणिमो च्चिय केरिस-रूवं रएमि ता एयं। किं ता वंकं रइमो किं ता ललियक्खरं काहं। जेण, मुद्धो ण मुणइ वंकं छेओ पुण हसइ उज्जुयं भणियं। उज्जुय-छयाण हियं तम्हा छेउज्जुयं भणिमो।। अलं च इमिणा विहव-कल-बालियालोल-लोयण-कडक्ख-विक्खेव-विलास
