Page Text
________________ पाइअविनाणकहा-२ एवं भगवया भणियमेत्ते सयलसुरासुरनरवरिंदाणं दिट्ठीओ रण्णुंदुरस्स उवरिं निवडिआओ, सो य आगंतूण भत्तिभरनिब्भरो भगवओ पायवीढसंसिओ महियलट्ठवियमत्थओ किं किंपि णियभासए भणिउं पवत्तो / तियसनाहेण च भणियं- भगवं ! महंतं मम कोऊहलं जं एसो अहमतुच्छजाइओ रण्णथलीनिवसिरो रण्णुंदरो सव्वाणं चेव अम्हाणं पढमं सिद्धिसिरिं (पुरिं), पाविहिइ त्ति कहं वा इमिणा थोवकम्मेण होइऊण एसा खुद्दजाई पावियत्ति ? / ___ भगवया भणियं-विंझो नाम महीहरो अस्थि, तस्स कुहरे विंझवासो नाम संनिवेसो, तत्थ महिंदो नाम राया, तस्स तारा णाम महादेवी, तीए पुत्तो, ताराचंदो अट्ठवरिसमेत्तो / एयम्मि अवसरे कोसलेण रण्णा ओक्खंदं दाऊण तं संणिवेसं अक्कंतं / तहिं निग्गओ महिंदो जुज्झिउं पयत्तो, जुझंतो च विणिवाइओ / हयं सेण्णं पलाइउं पयत्तं, सव्वो च जणो जीवसेसो पलाइओ, तया तारा वि महादेवी तं पुत्तं ताराचंदं अंगुलीए लाइऊण जणेण समयं पलायमाणी च भरुयच्छं णाम नयरं तत्थ संपत्ता / तओ तत्थ वि कस्स सरणं पवज्जामु त्ति ? ण जाणए, कयाइ वि कस्सइ खलजणस्स मुहं न दिटुं, तओ तण्हाछुहापरिस्समुव्वेय-वेवमाणहियया कत्थ वच्चामि ?, कत्थ न वञ्चामि ?, किं करोमि ?, किं वा न करोमि ?, कत्थ पविसामि ?, कं पुच्छामि ?, कहं वा वट्टियव्वं ?' ति चिंतयंती सुण्णमणा रण्णकुरंगबाला इव कायरहियया एक्कम्मि नयरचञ्चरमंडवे पविसिउं पयत्ता / खणेण च गोयरग्गणिग्गयं साहुणीणं जुगलयं दिटुं, तं च दठूण तीए चिंतियं-'अहो एयाओ साहुणीओ महाणुभागाओ धम्मनिरयाओ वच्चंतीओ य पुरा मम पेइयम्मि गेहम्मि पूयणिज्जाओ, ता इमाओ जइ सरणं उवगच्छामि तया वरं ति चिंतयंती पुत्तं अंगुलीए धेत्तूणं उट्ठिऊण साहुणीओ वंदियाओ / ताहिं च आसासिआ, साणुणयं पुच्छिया कत्तो आगया सि'?। तीए भणियं भगवईओ ! विंझपुराओ / ताहिं भणियं 'कस्स पाहुणिआ? तीए भणियं ‘इमं पि न याणामि' / तओ तीए रूवलायण्ण-लक्खणाइसयं पेच्छंतीणं तारिसं च कलुणं भासियं सुणंतीणं साहुणीणं अणुकम्पा जाया / ताहिं भणियं-'जइ तुह इह नयरे कोइ णत्थि, ता एहि पवत्तिणीए पाहुणी होहि' / तीए वि अणुग्गहो त्ति भणंतीए पडिवण्णं / गंतुं च पयत्ता, मग्गाणुलग्गा सा पवत्तिणीए दिट्ठा / चिंतियं च पवत्तिणीए एसा का वि दुहिआ, असरिसरूवलायण्णरूवजोव्वणलक्खणविलासेहिं लक्खियं च जहा कावि रायदारियत्ति, इमो य से अइसुंदरो पासे पुत्तओ त्ति / तीए वि उवगंतूण वंदिया पवत्तिणी / आससिया पुच्छिया च ‘कत्तो आगया, साहियं च णिययवुत्तंतं पवत्तिणीए / तओ सेज्जायरघरे समप्पिया / सज्जायरेहिं पि निययपुत्ति व्व विगयसमा सा कया / सो च रायपुत्तो मज्जिय-जिमिय-परिहिओ कओ, सुहनिसण्णो य / समयंतरे एगया पवत्तिणीए भणिया 'वच्छ ! तए संपयं किं कायव्वं ? तीए भणियं 'भगवइ ! जो मह नाहो सो रणम्मि विणिवाइओ, विंझपुरं विणटुं, णट्ठो परियणो, कोसलनरिंदो चंडो, बालो पुत्तो अपरियणो, ता नत्थि रज्जासा / अह उण एत्थ पत्तकालं तं करेमि, जेण पुणो वि ण एरिसीओ आवईओ पावेमि त्ति / सव्वहा तुमं जं आदिससि तं चेय करेमि' त्ति / 1. अवस्कन्दम्, सैन्येन नगरवेष्टनम् / / 2. पैतृके / / 3. प्राघुर्णिक:- अतिथि: / / 4. विगतश्रमा / /
| SR No. | 004269 |
| Book Title | Paiavinnankaha Part 02 |
| Original Sutra Author | N/A |
| Author | Kastursuri, Somchandrasuri |
| Publisher | Rander Road Jain Sangh |
| Publication Year | 2005 |
| Total Pages | 254 |
| Language | Hindi, Sanskrit |
| Classification | Book_Devnagari |
| File Size | 38 MB |