________________ उज्जम्मस्स पहाणत्तणम्मि विउसवरदुगस्स कहा-३९ 93 कालीदासो कहेइ-“हे नरिंद ! जह दक्खाए रसो चक्खिज्जमाणो महुरो खट्टो वा नज्जइ, तह य एयाण विवाओ कसिज्जइ, तेण सच्चो असञ्चो वा जाणिज्जइ" / राया कहेइ-'कसणकिरियाए अत्थि को वि उवाओ ?, जइ सिया, तया कसिज्जउ' / कालीदासो तया ते दुण्णि विउसे बोल्लाविऊण तेसिं नेत्ताइं पडेण बंधित्ता, दुवे य हत्थे पिट्ठस्स पच्छा बंधिअ, पाए गाढयरं निअंतिअ अंधयारमए अववरगे ठवेइ, कहेइ य " जो दइव्ववाई सो दइव्वेण छुट्टउ, जो उज्जमवाई सो उज्जमेण छुट्टेज्जा " एवं कहिऊण सो पच्छा नियत्तो / / तओ जो नियइवाई सो ‘जं भावि तं होहिइ' त्ति मन्नमाणो निञ्चितो समाणो सुहेण तत्थ सुत्तो / उज्जमवाई जो, सो छुट्टणाय बहुं उज्जमं कुणेइ, हत्थे पाए अ भूमीए उवरिं इओ तओ घंसेइ, परंतु गाढयरबंधणत्तणेण जया सो न छुट्टिओ, तया तं नियइवाई विउसो कहेइ-“किं मुहा उज्जमकरणेण, एसो निविडो बंधो कया वि न छुट्टिहिइ ?, निष्फलेण बलहाणिकारणायसेण किं ?, खुहापिवासापीलिआणं पि अम्हाणं नियईए सरणं चिअ वरं" /
