Page Text
________________ पुण्ण-पावाणं चउभंगीए मंतिपुत्तीए कहा-३६ -भिन्नपयइवंतजणजुत्तो मंती पुत्तीए रहस्सं अजाणतो विविहतक्कं कुणंतो निवसहाए गओ / तया अन्ने वि बहवो नयरजणा मंतिस्स पञ्चुत्तरजाणणत्थं तत्थ समागया / सहाए उवविद्वेण नरिंदेण जहारिहं सव्वे सक्कारिऊण, मंतिणा सह समागए पुरिसे दट्ठण पुढे-'किमेए समागया?' / मंती कहेइ-'तुम्हाणं पञ्चत्तरदाणत्थं एए परिसा समाणीआ' / नरिंदो भासेइ-'सिग्धं मम पसिणस्स उत्तरं देहि' / मंती वएइ–'तुम्हं इमस्स पसिणस्स उत्तरं मम पुत्ती चंदकंता दाही' / ___नरिंदपुट्ठा सा मंतिपुत्ती पडिभासेइ-“हे नरवर ! सिरिमंताणं अत्थिअत्थिरूवपढमपण्हस्स उत्तरं अयं चिअ सेट्ठिवरो नायव्वो" त्ति कहिऊण सेट्ठिवरो दंसिओ / राइणा वुत्तं-'कहमेसो' / सा कहेइ-" जओ एसो सेट्ठिवरो पुव्वभवसमायरिअधम्मप्पहावेण बहुधणवंतो अत्थि, तह य इह भवे वि दाणसीलतवभावधम्मं सम्ममाराहतो दीण-दुक्खिअजणे उद्धरंतो परभवे वि अत्थं सुहं च पाविहिइ / अओ अत्थि-अत्थि त्ति पढमपसिणस्स उत्तरं इमो सेट्ठिवरो सिया" / / 1 / / बीयपण्हस्सुत्तरे वसणासत्तं तं धणिअपुत्तं दंसिऊण कहेइ-“एस धणिअपुत्तो केवलं कामभोगेहिं पिउसंतियं दव्वं विणासेइ, तह य सद्धम्मकम्महीणो सत्तवसणेहिं दुल्लहं माणवभवं निष्फलं गमावेइ, तओ अस्स पासे अहुणा दव्वमत्थि, भवंतरे सो निद्धणो दुही य होही, तेण अस्थि-नत्थिरूवपसिणस्स उत्तरं इमो धम्मरहिओ धणिअपुत्तो जाणियव्वो” / / 2 / / तह य तइयपञ्चुत्तरदाणे सा तं महारिसिं उवदंसेइ, उवदंसित्ता कहेइ-“एसो महप्पा सइ सव्वपावकम्मविरओ उवसंतो जिइंदिओ परुवयारिक्कतल्लिच्छो सद्धम्मोवएसदाणेण य अण्णेसि पि कल्लाण करणपरो अप्पडिबद्धो विहरेइ, तम्हा अहुणा अणगारत्तणेण अस्स पासे किंपि नत्थि, किंतु भवंतरे अणुवमं सव्वं पाविस्सइ, महारिद्धिवंतो य होस्सइ, तेण नत्थि-अत्थिरूवतइअपसिणुत्तरदाणे एसो महप्पा निदंसिओ" / / 3 / / ___चउत्थस्स पण्हस्सुत्तरे तं भिक्खुअमुवदंसित्ताणं सा मंतिपुत्ती वएइ-“एस भिक्खू निद्धंसपरिणामो निरत्थयजीववहतप्परो भिक्खाए सकटुं जीवणं निव्वहेइ / तओ इयाणिं इमस्स समीवे किंपि नत्थि, भवंतरे य पावकम्मेहिं दुग्गईए गमिस्सइ, तत्थ किमवि न पाविस्सइ / तओ नत्थि-नत्थिरूवचउत्थपण्हुत्तरम्मि एसो भिक्खू जाणियब्बु” त्ति / / 4 / / __ एवं मंतिपुत्तिकहिअं पञ्चुत्तरं सोच्चा नरिंदो सव्वा य परिसा अईव संतुट्ठा संजाया / महिवई वि तीए बुद्धीए परितुट्ठो सहासमक्खं तं बहुं पसंसित्ता सुवण्णालंकारेहिं सक्कारित्ता सम्माणित्ता य घरंमि गंतुं अणुण्णं देइ / नरिंदपसंसिओ मंती वि सहरिसिओ नियपुत्तीए सह गेहे समागओ / / उवएसो पुण्णपावाण भंगीए, फलं नया इहं सया / 'पुण्णाणुबंधिपुण्णस्स, उज्जया होह अज्जणे' / / 2 / / पुण्णपावाण चउभंगीए मंतीपुत्तीए छत्तीसइमी कहा समत्ता / / 36 / / -जणपरंपराओ
| SR No. | 004268 |
| Book Title | Paiavinnankaha Part 01 |
| Original Sutra Author | N/A |
| Author | Kastursuri, Somchandrasuri |
| Publisher | Rander Road Jain Sangh |
| Publication Year | 2005 |
| Total Pages | 224 |
| Language | Hindi, Sanskrit |
| Classification | Book_Devnagari |
| File Size | 33 MB |