________________
१०
जम्बूद्वीप प्रज्ञप्ति सूत्र
तए णं ते मेहकुमारा देवा तित्थगरचिइगं जाव णिव्वावेंति। तए णं से सक्के देविंदे देवराया भगवओ तित्थगरस्स उवरिल्लं दाहिणं सकहं गेण्हइ, ईसाणे देविंदे देवराया उवरिल्लं वामं सकहं गेण्हइ, चमरे असुरिंदे असुरराया हिडिल्लं दाहिणं सकहं गेण्हइ, बली वइरोअणिंदे वइरोअणराया हिडिल्लं वामं सकहं गेण्हइ, अवसेसा भवणवई जाव वेमाणिया देवा जहारिहं अवसेसाई अंगुवगाई केइ जिणभत्तीए केइ जीअमेयं तिकट्ट केइ धम्मो तिकट्ट गेण्हंति।
तए णं से सक्के देविंदे देवराया बहवे भवणवइ जाव वेमाणिए देवे जहारिहं एवं वयासी-खिप्पामेव भो देवाणुप्पिया! सव्वरयणामए महइमहालए तओ चेइयथूभे करेह, एगं भगवओ तित्थगरस्स चिइगाए. एगं गणहरचिइगाए एगं अवसेसाणं अणगाराणं चिइगाए, तए णं ते बहवे जाव करेंति। तए णं ते बहवे भवणवइ जाव वेमाणिया देवा तित्थगरस्स परिणिव्वाणमहिमं करेंति २ त्ता जेणेव णंदीसरवरे दीवे तेणेव उवागच्छंति। तए णं से सक्के देविंदे पुरथिमिल्ले अंजणगपव्वए अट्टाहि महामहिमं करेंति। ___तए णं सक्कस्स देविंदस्स चत्तारि लोगपाला चउसु दहिमुहगपव्वएसु अट्ठाहि महामहिमं करेंति, ईसाणे देविंदे देवराया उत्तरिल्ले अंजणगपव्वए अट्ठाहि महामहिमं करेंति, तस्स लोगपाला चउसु दहिमुहगपव्वएसु अट्ठाहि महामहिमं करेंति, चमरोअ दाहिणिल्ले अंजणगे तस्स लोगपाला चउसु दहिमुहगपव्वएसु बली पचत्थिमिल्ले अंजणगे, तस्स लोगपाला दहिमुहगेसु पव्वएसु तए णं ते बहवे भवणवइ वाणमंतर जाव अट्ठाहियाओ महामहिमाओ करेंति २ त्ता जेणेव साई २ विमाणाई जेणेव साइं २ भवणाई जेणेव साओ २ सभाओ सुहम्माओ जेणेव सगासगा माणवगा चेइयखंभा तेणेव उवागच्छंति २ त्ता वइरामएसु गोलसमुग्गएसु जिणसकहाओ पक्खिवंति २ ता अग्गेहिं वरेहिं गंधेहि य मल्लेहि य अच्चेति २ त्ता विउलाई भोगभोगाइं भुंजमाणा विहरंति।
Jain Education International
For Personal & Private Use Only
www.jainelibrary.org
