________________
उत्तराध्ययनसूत्र
मणपरिणामे य कए देवा य जहोइयं समोइण्णा । सव्विड्ढीए सपरिसा निक्खमणं तस्स काउंजे ॥२१॥ देवमणुस्सपरिवुडो सीयारयणं तओ समारूढो। निक्खमिय वारगाओ रेवययंमि ट्ठिओ भगवं ॥२२॥ उज्जाणं संपत्तो ओइण्णो उत्तिमाओ सीयाओ। साहस्सीए परिवुडो अह निक्खमई उ चित्ताहिं ॥२३॥ अह से सुगन्धगन्धिए तुरियं मउकुंचिए। सयमेव लुचई केसे पंचमुट्ठीहिं समाहिओ ।।२४॥ वासुदेवो य णं भणइ लुत्तकेसं जिइन्दियं । इच्छियमणोरहे तुरियं पावसू तं दमीसरा ।।२५॥ नाणेणं दंसणेणं च चरित्तेण तवेण य।। खन्तीए मुत्तीए वड्ढमाणो भवाहि य ॥२६॥ एवं ते रामकेसवा दसारा य बहू जणा। अरिट्ठणेमि वन्दित्ता अभिगया बारगापुरिं ॥२७॥ सोऊण रायकन्ना पव्वज्जं सा जिणस्स उ। नीहासा य निराणन्दा सोगेण उ समुत्थिया ॥२८॥ राईमई विचिन्तेइ धिरत्थु मम जीवियं । जा हं तेण परिच्चत्ता सेयं पव्वइउं मम ॥२९॥ अह सा भमरसन्निभे कुच्चफणगसाहिए । सयमेव लुचई केसे धिइमन्ता ववस्सिया ॥३०॥ वासुदेवो य णं भणइ लुत्तकेसं जिइन्दियं । संसारसागरं घोरं तर कन्ने लहं लहं ॥३१॥ सा पव्वइया सन्ती पव्वावेसी तहिं बहं । सयणं परियणं चेव सीलवन्ता बहुस्सुया ॥३२॥ गिरि रेवययं जन्ती वासेणुल्ला उ अन्तरा। वासन्ते अन्धयारंमि अन्तो लयणस्स सा ठिया ॥३३॥ चीवराई विसारन्ती जहाजाय त्ति पासिया। रहनेमी भग्गचित्तो पच्छा दिट्ठो य तीइ वि ॥३४॥ भीया य सा तहिं दटुं एगन्ते संजयं तयं । बाहाहिं का संगोप्फ वेवमाणी निसीयई ॥३५॥
Jain Educationa International
For Personal and Private Use Only
www.jainelibrary.org
